कात्रज | प्रतिनिधी
आज दिनांक ५ फेब्रुवारी २०२६ रोजी कात्रज चौकातून दत्तनगरच्या दिशेने जाणाऱ्या मुख्य मार्गावर रिक्षाचालकांच्या बेशिस्त व अवैध कारभारामुळे निर्माण झालेल्या वाहतूक कोंडीवर भारती विद्यापीठ ट्रॅफिक विभागाकडून मोठी आणि कडक कारवाई करण्यात आली.कात्रज चौक परिसरात रस्त्यावरच रिक्षा उभ्या करून अवैध पद्धतीने वडाप वाहतूक, तसेच नो पार्किंग झोनमध्ये आडव्या पद्धतीने शेकडो रिक्षांचे पार्किंग केल्यामुळे नागरिकांना प्रचंड त्रास सहन करावा लागत होता. सकाळ-संध्याकाळच्या वेळेत वाहनांची मोठी गर्दी होत असून, अपघाताचा धोका देखील वाढत होता.या पार्श्वभूमीवर भारती विद्यापीठ ट्रॅफिक विभागाने नियंत्रण मोहीम राबवत, नियमांचे उल्लंघन करणाऱ्या रिक्षाचालकांवर थेट कारवाई केली.
अवैध वडाप वाहतूक करणाऱ्या रिक्षांवर दंडात्मक कारवाई करण्यात आली, तर नो पार्किंगमध्ये उभ्या असलेल्या रिक्षा हटवण्यात आल्या.या कारवाईमुळे काही काळातच कात्रज चौकातील वाहतूक सुरळीत झाली असून, नागरिकांना दिलासा मिळाला आहे. ट्रॅफिक पोलिसांनी यापुढेही अशा प्रकारची कारवाई सातत्याने सुरू राहील, तसेच नियम मोडणाऱ्यांवर कठोर कारवाई केली जाईल, असा इशाराही दिला आहे.
नागरिकांनी देखील वाहतूक नियमांचे पालन करावे, सहकार्य करावे, असे आवाहन ट्रॅफिक विभागाकडून करण्यात आले आहे.
