प्रतिनिधी : उमेश अहिरे
भोर तालुक्यातील स्थानिक स्वराज्य संस्थांच्या निवडणुकीत खुटवड दांपत्याने प्रभावी यश मिळवत राजकीय क्षेत्रात आपली पकड पुन्हा सिद्ध केली आहे. राष्ट्रवादी काँग्रेस पक्षाचे उमेदवार श्री. विक्रम खुटवड यांनी जिल्हा परिषदेसाठी तर सौ. तृप्तीताई खुटवड यांनी पंचायत समितीसाठी विजय मिळवला. मतदारांनी विकासकामांना आणि सातत्यपूर्ण जनसंपर्काला दिलेली ही ठाम पसंती मानली जात आहे.
गेल्या काही वर्षांत तालुक्यात राबवण्यात आलेल्या विविध योजनांमुळे खुटवड दांपत्याची ओळख विकासाभिमुख नेतृत्व म्हणून निर्माण झाली. विक्रम खुटवड यांनी पंचायत समितीचे उपसभापती म्हणून काम करताना पायाभूत सुविधांवर भर दिला, तर तृप्तीताईंनी महिलांचे प्रश्न, पाणी, रस्ते आणि ग्रामीण भागातील गरजांकडे सातत्याने लक्ष वेधले. निकालानंतर बोलताना विक्रम खुटवड म्हणाले, “जनतेसमोर आम्ही आमच्या कामाचा हिशेब ठेवला आणि त्याच बळावर मतांची अपेक्षा व्यक्त केली होती.”
या निवडणुकीत पक्षातील वरिष्ठ नेत्यांनी दाखवलेला विश्वास खुटवड दांपत्याने योग्य ठरवला. भोर तालुक्याचे माजी नेते काशिनाराव खुटवड यांनी दिलेल्या विकासपरंपरेला पुढे नेत मतदारांपर्यंत पोहोचण्याचा प्रयत्न करण्यात आला, असे कार्यकर्त्यांकडून सांगितले जात आहे.
राजकीय वातावरण तापलेले असतानाही भोरमधील मतदारांनी कामाला प्राधान्य दिले. निष्ठा, संपर्क आणि विकासाचा आराखडा यामुळेच हा विजय शक्य झाल्याची चर्चा सर्वत्र रंगली आहे.
निकाल जाहीर होताच समर्थकांनी आनंदोत्सव साजरा केला. गुलालाची उधळण, फटाके आणि घोषणांनी परिसर दुमदुमून गेला. “हा विजय जनतेचा आहे. पुढील काळात अधिक वेगाने विकासकामे राबवू,” अशी ग्वाही विक्रम खुटवड यांनी दिली.
