खासदार शरद पवार यांची प्रकृती बिघडली आहे. शरद पवार सध्या बारामतीत आहेत. बारामतीतून त्यांना पुण्यातील रुबी हॉल क्लिनिकमध्ये आणले जाणार आहे. गेल्या काही दिवसांपासून शरद पवार यांची तब्येत बरी नसल्याचे सांगितले जात नव्हते.
आज मात्र त्यांना जास्त त्रास झालेला आहे. त्यांना ताप, खोकला आणि कफ असल्याचे सांगण्यात आले आहे. शरद पवार यांच्या कार्यालयाने तशी माहिती दिली आहे. आज बारामती तालुक्यातील काठेवाडी येथे दिवंगत नेते अजित पवार यांच्या तेराव्याचा विधी पार पडतो आहे. या विधीला शरद पवार तसेच त्यांचे इतर कुटुंबीय उपस्थित राहणार होते. परंतु आज सकाळपासूनच शरद पवार यांना त्रास होत होता.
शरद पवार यांना ताप, खोकला
शरद पवार यांना सकाळपासूनच खोकला, ताप, सर्दीचा त्रास जाणवत असल्याने सकाळीच डॉक्टरांची एक टीम शरद पवार यांच्या बारामतीतील गोविंदबाग या निवासस्थानी दाखल झाली होती. डॉक्टरांनी शरद पवार यांची नियमित तपासणी केली होती. त्यानंतर पुन्हा एकदा दुपारी डॉक्टरंची एक टीम शरद पवार यांची तपासणी करण्यासाठी गेले होते.
शरद पवार यांच्या ताफ्यात रुग्णावाहिका
शरद पवार यांना आता पुण्यातील रुबी हॉस्पिटलमध्ये दाखल करण्याचा निर्णय घेण्यात आला आहे. काही मिनिटांपूर्वीच शरद पवार हे पुण्याच्या दिशेने रवाना झाले आहेत. त्यांच्यासोबत शरद पवार यांची कन्या तथा खासदार सुप्रिया सुळेदेखील आहेत. शरद पवार यांच्या ताफ्यात एक रुग्णवाहिकादेखील आहे. थोड्याच वेळात शरद पवार पुण्यात दाखल होतील. त्यानंतर शरद पवार यांना रुग्णालयात दाखल केले जाईल. त्यांच्यावर पुण्यातील रुबी हॉस्पिटलमध्ये पुढील उपचार केले जातील.
अजितदादांच्या अंत्यविधीला शरद पवार उपस्थित
दरम्यान, शरद पवार यांना पुण्यात दाखल केल्यानंतर डॉक्टर त्यांची तपासणी करणार आहेत. त्यानंतर त्यांची सध्या प्रकृती कशी आहे? याबाबत त्यांच्या पक्षाकडून माहिती देण्यात येण्याची शक्यता आहे. अजितदादांच्या निधनानंतर त्यांच्या अंत्यविधीसाठी शरद पवार उपस्थित होते. त्यावेळी अजितदादा यांचा अपघात झाला आहे, यामागे कोणतेही राजकारण नाही, घातपात नाही, असे शरद पवार यांनी स्पष्ट केले होते.
