गेल्या काही दिवसांपासून पुणे शहरात किमान तापमानात मोठी वाढ झाली होती. मात्र, शुक्रवारी (ता. २०) किमान तापमानात एक अंश सेल्सिअसने घट नोंदविण्यात आली. तर पुढील दोन दिवस हवामान स्थिर राहणार असून, त्यानंतर पुन्हा किमान तापमानात वाढ होण्याची शक्यता भारतीय हवामानशास्त्र विभागाने वर्तविली आहे.
शहर आणि परिसरात गुरुवारी १८.४ अंश सेल्सिअस इतके किमान तापमान नोंदविण्यात आले होते. यात एक अंश सेल्सिअसची घट होऊन ते शुक्रवारी (ता. २०) १७.५ अंश सेल्सिअस नोंदविले गेले. तर कमाल तापमानात मात्र एक अंश सेल्सिअसची वाढ होऊन ते ३३ अंश सेल्सिअस इतके राहिले. तापमानात चढ-उतार होत असले तरी शहरातील उकाडा मात्र कायम आहे.
शुक्रवारी पहाटे हवेत गारवा होता. मात्र, दुपारी कडक उन्हाचा चटका जाणवला. त्यानंतर सायंकाळी अंशतः ढगाळ वातावरण होते. त्यामुळे पुणेकरांनी एकाच दिवशी तिन्ही ऋतूंचा अनुभव घेतला. पुढील दोन ते तीन दिवस हवामान स्थिर राहणार असून, त्यानंतर मात्र त्यामध्ये पुन्हा हळूहळू वाढ होणार असल्याचे हवामानशास्त्र विभागाने सांगितले.
पुणे आणि परिसरात शनिवारी (ता. २१) कमाल तापमान स्थिर राहून किमान तापमानात किंचित घट होण्याची शक्यता आहे. कमाल तापमान ३३ अंश सेल्सिअस, तर १७ अंश सेल्सिअस किमान तापमान नोंदविण्यात येणार आहे.आकाश मुख्यतः निरभ्र राहून सकाळी विरळ धुके पडण्याची शक्यता आहे. तर रविवारपासून (ता. २२) कमाल तापमान ३३ अंश सेल्सिअस, तर किमान तापमान १८ अंश सेल्सिअस नोंदविण्यात येणार आहे.
