आगर मालवा जिल्ह्यातील बगुलामुखी मंदिर येथे चप्पल चोरीची घटना घडली असून, संबंधित प्रकरण थेट पोलीस अधीक्षकांपर्यंत पोहोचल्याने चर्चेला उधाण आले आहे.
मिळालेल्या माहितीनुसार, बडागाव येथील नायब तहसीलदार अरुण चंद्रवंशी हे दर्शनासाठी मंदिरात गेले होते. दर्शन आटोपून बाहेर आल्यानंतर त्यांनी ठेवलेल्या चप्पला चोरीला गेल्याचे त्यांच्या निदर्शनास आले. त्यांनी तत्काळ मंदिर परिसरात शोधाशोध केली. जवळपास तासभर प्रयत्न करूनही चप्पला सापडल्या नाहीत.
यानंतर त्यांनी सोबत असलेल्या तलाठ्यासह इतर कर्मचाऱ्यांना शोधमोहीम राबविण्याच्या सूचना दिल्या. मात्र, त्यातूनही काही निष्पन्न झाले नाही.
घटनेचे गांभीर्य लक्षात घेऊन मंदिरातील सीसीटीव्ही फुटेज तपासण्यात आले. फुटेजमध्ये एका व्यक्तीने चप्पल उचलून नेताना दिसल्याचे सांगण्यात येते. मंदिर प्रशासनाच्या मदतीने संबंधित व्यक्तीचा शोध घेऊन त्याला ताब्यात घेण्यात आले. चौकशीदरम्यान त्याने चोरीची कबुली दिल्याची माहिती सूत्रांनी दिली आहे.
त्यानंतर नायब तहसीलदारांनी संपूर्ण घटनेचा तपशील नमूद करत पोलीस अधीक्षकांना लेखी पत्र पाठविले. पत्रात मंदिर परिसरात वारंवार होणाऱ्या चप्पल तसेच इतर साहित्य चोरीच्या घटनांचा उल्लेख करण्यात आला आहे. तसेच आरोपीविरुद्ध भारतीय नागरिक सुरक्षा कायद्यातील कलम १७० आणि १२६ अंतर्गत कारवाई करण्यात यावी, अशी मागणी करण्यात आली आहे.
सदर पत्र सोशल मीडियावर व्हायरल झाले असून या घटनेची विविध स्तरांवर चर्चा सुरू आहे. प्रकरणी पोलीस प्रशासनाकडून पुढील कायदेशीर कार्यवाही अपेक्षित आहे.
