छत्रपती शिवाजी महाराज जयंतीनिमित्त लोणावळा शहरात होणाऱ्या विविध कार्यक्रमांच्या पार्श्वभूमीवर शहरातील आठवडे बाजार बंद ठेवण्याचा निर्णय घेण्यात आला आहे. लोणावळा नगरपरिषदेचे मुख्याधिकारी अशोक साबळे यांच्या वतीने याबाबतचा आदेश जारी करण्यात आला आहे.
दरवर्षीप्रमाणे यंदाही शिवजयंती मोठ्या उत्साहात साजरी करण्यात येणार असून शहरात भव्य शिवज्योत मिरवणूक काढण्यात येणार आहे. ही मिरवणूक भांगरवाडी रस्ता तसेच हनुमान टेकडी रस्ता या मार्गांवरून जाणार आहे.
मिरवणुकीदरम्यान मोठ्या प्रमाणावर नागरिकांची उपस्थिती आणि वाहनांची वर्दळ वाढण्याची शक्यता असल्याने परिसरात वाहतूक कोंडी होऊ शकते.नागरिकांची गैरसोय टाळण्यासाठी तसेच वाहतूक सुरळीत ठेवण्यासाठी शहरातील आठवडे बाजार त्या दिवशी बंद ठेवण्याचा निर्णय घेण्यात आल्याचे नगरपरिषद प्रशासनाने स्पष्ट केले आहे.
नगरपरिषदेने व्यापारी व नागरिकांना या निर्णयाचे सहकार्य करण्याचे आवाहन केले असून शिवजयंतीचे कार्यक्रम शांततेत आणि उत्साहात पार पाडण्यासाठी प्रशासन सज्ज असल्याचेही सांगितले आहे.
