पुणे विद्यापीठ चौकातील बहुप्रतीक्षित एकात्मिक दुमजली उड्डाणपुलाचे लोकार्पण आज रविवारी (दि. 8) सकाळी 10 वाजता होणार आहे. राज्याचे मुख्यमंत्री देवेंद्र फडणवीस यांच्या हस्ते या पुलाचे ऑनलाइन उद्घाटन करण्यात येणार आहे.
या उड्डाणपुलामुळे विद्यापीठ रस्ता, पाषाण आणि बाणेर परिसरातील वाढती वाहतूक कोंडी कमी होऊन वाहनचालकांना मोठा दिलासा मिळण्याची अपेक्षा व्यक्त केली जात आहे.हा महत्त्वाकांक्षी प्रकल्प पुणे महानगर प्रदेश विकास प्राधिकरणाने (पीएमआरडीए) पूर्ण केला असून, शहरातील वाहतूक व्यवस्थेला गती देण्यासाठी हा पूल महत्त्वाचा टप्पा ठरणार आहे. या उद्घाटन सोहळ्यास केंद्रीय राज्यमंत्री मुरलीधर मोहोळ, उपमुख्यमंत्री एकनाथ शिंदे तसेच उपमुख्यमंत्री व पुण्याच्या पालकमंत्री सुनेत्रा पवार प्रमुख अतिथी म्हणून उपस्थित राहणार आहेत.
याशिवाय विधानपरिषदेच्या उपसभापती डॉ. नीलम गोऱ्हे, विधानसभेचे उपाध्यक्ष अण्णा बनसोडे, उच्च व तंत्र शिक्षणमंत्री चंद्रकांत पाटील, कृषिमंत्री दत्तात्रय भरणे, राज्यमंत्री माधुरी मिसाळ आणि पुण्याच्या महापौर मंजूषा नागपुरे यांची उपस्थिती राहणार आहे.
तसेच खा. मेधा कुलकर्णी, खा. सुप्रिया सुळे, खा. श्रीरंग बारणे, खा. डॉ. अमोल कोल्हे यांच्यासह जिल्ह्यातील विधानपरिषद व विधानसभा सदस्यही या कार्यक्रमास उपस्थित राहणार आहेत.
प्रवासाचा वेळ होणार कमीपुण्यातील सर्वाधिक वर्दळीच्या चौकांपैकी एक असलेल्या विद्यापीठ चौकातील वाहतूक कोंडी लक्षात घेऊन या एकात्मिक दुमजली (डबलडेकर) उड्डाणपुलाची उभारणी करण्यात आली आहे. मेट्रो मार्गिका आणि उड्डाणपूल अशा एकत्रित रचनेमुळे सिग्नलवरील ताण कमी होऊन वाहनचालकांचा प्रवास अधिक जलद आणि सुलभ होणार आहे.
