तक्रारदाराविरुद्ध गुन्हा दाखल न करण्यासाठी दोन लाख रुपयांची लाच मागितल्याच्या आरोपावरून बंडगार्डन पोलिस ठाण्यात कार्यरत एका उपनिरीक्षकाविरुद्ध लाचलुचपत प्रतिबंधक (एसीबी) विभागाने गुन्हा दाखल केला आहे.या कारवाईमुळे शहर पोलिस दलात खळबळ उडाली आहे.
या प्रकरणात ४० वर्षीय व्यक्तीने तक्रार दिली आहे. ‘एसीबी’ने दिलेल्या माहितीनुसार, तक्रारदार व्यक्तीच्या विरोधात एका व्यक्तीने बंडगार्डन पोलिस ठाण्यात फसवणुकीसंदर्भात अर्ज केला होता. या अर्जाची चौकशी पोलिस उपनिरीक्षक संदीप खेडकर (रा. वानवडी) करत होते.
या प्रकरणात तक्रारदाराविरुद्ध गुन्हा दाखल न करण्यासाठी खेडकर यांनी दोन लाख रुपयांची लाच मागितली. याबाबत तक्रारदाराने तीन फेब्रुवारी रोजी ‘एसीबी’कडे तक्रार केली. पडताळणीदरम्यान खेडकर यांनी स्वतःसाठी आणि वरिष्ठांसाठी मिळून तडजोडीअंती एक लाख रुपयांची लाच मागितल्याचे निष्पन्न झाले.
त्यानुसार उपनिरीक्षकाविरुद्ध बंडगार्डन पोलिस ठाण्यात ९ मार्च रोजी गुन्हा दाखल करण्यात आला आहे.’एसीबी’ पुणे विभागाचे पोलिस अधीक्षक शिरीष सरदेशपांडे यांच्या मार्गदर्शनाखाली सहाय्यक पोलिस आयुक्त नीता मिसाळ यांच्या पथकाने ही कारवाई केली.
पुढील तपास पोलिस निरीक्षक प्रवीण निंबाळकर करत आहेत. दरम्यान, कोणताही शासकीय अधिकारी, कर्मचारी कायदेशीर शुल्काव्यतिरिक्त लाच मागत असल्यास नागरिकांनी लाचलुचपत प्रतिबंधक विभागाशी संपर्क साधावा, असे आवाहन करण्यात आले आहे.
