महाराज सयाजीराव गायकवाड चौकातील पदपथावर गेल्या अनेक वर्षांपासून खासगी व्यावसायिकांनी अतिक्रमण केले आहे. गॅरेज आणि भंगार दुकानांनी पदपथ व्यापल्याने पादचाऱ्यांना जीवघेण्या वाहतुकीतूनच चालणे भाग पडत आहे.महापालिकेने लाखो रुपये खर्च करून उभारलेले हे पदपथ पादचाऱ्यांसाठी की व्यावसायिकांसाठी, असा प्रश्न उपस्थित होत आहे.
पुणे महापालिकेकडे नागरिकांनी कररूपी भरलेल्या पैशातून पदपथ उभारले आहेत. परंतु मुंढवा येथील महाराज सयाजीराव गायकवाड चौकात गॅरेज व भंगाराच्या दुकानांनी संपूर्ण पदपथ व्यापला आहे. भंगाराच्या लोखंडी साहित्याने पदपथावरचे ब्लॉक तुटले आहेत. तसेच भंगार भरण्यासाठी आलेली वाहने पदपथ व रस्त्यावर लावली जातात. तसेच दुचाकी दुरुस्तीचे दुकान पदपथावर आहे.
ग्राहकांची वाहने पदपथ व रस्त्यावरच लावून दुरुस्त केली जातात.रस्त्यावर दुचाकी दुरुस्ती केली जात असल्यामुळे वाहतुकीला अडथळा होतो. त्यामुळे वाहनांच्या रांगा लागून वाहतूक कोंडी होते. व्यावसायिकांनी मन मानेल त्या पद्धतीने वागताना महापालिकेचे पादचाऱ्यांविषयीच्या नियमाकडे दुर्लक्ष केले आहे.
त्यामुळे किरकोळ अपघातातही वाढ झाली आहे. येथे पादचाऱ्यांच्या कायद्याच्या कठोर अंमलबजावणीबाबत पोलिस आणि महापालिका प्रशासनही उदासीन असल्याचे नागरिकांचे म्हणणे आहे.
अतिक्रमण हटविणे पालिकेचे काममुंढवा वाहतूक विभागाचे सहायक पोलिस निरीक्षक संदीप जोरे म्हणाले, ”पदपथावरील व्यवसायामुळे तेथे वाहतुकीला अडथळा होतो. पदपथावरील अतिक्रमण हटविणे हे महापालिकेचे काम आहे.” याबाबत हडपसर-मुंढवा क्षेत्रीय कार्यालयाचे अतिक्रमण निरीक्षक किरण शिंदे म्हणाले, ”पदपथावर अतिक्रमण करणाऱ्यांवर कारवाई केली जाईल.”वारंवार अतिक्रमणे करणाऱ्यांवर क्षेत्रीय कार्यालयाच्या अतिक्रमण निर्मूलन पथकाद्वारे कारवाई केली जाते.
मात्र अतिक्रमण काढल्यानंतर ते पुन्हा होऊ नये, याबाबत संबंधित क्षेत्रीय कार्यालय व त्यांच्याकडील नियुक्तीस असणारे अधिकारी व सेवकांची तसेच स्थानिक पोलिस विभाग यांची संयुक्त जबाबदारी असते. परंतु येथे खासगी व्यापारी गेल्या अनेक वर्षांपासून ठाण मांडून बसले आहेत. तरीही कारवाई होत नाही.
