हिंजवडी आयटी पार्क परिसरातील वाहतूक कोंडी आणि अपुऱ्या पायाभूत सुविधांमुळे आयटी कंपन्यांचे स्थलांतर रोखण्यासाठी पुरंदरमध्ये आयटी पार्क उभारण्याबाबत शासन सकारात्मक आहे.
महसूल विभागाची प्रक्रिया पूर्ण होताच, जमीन महाराष्ट्र औद्योगिक विकास महामंडळाकडे हस्तांतरित करून प्रकल्पाची कार्यवाही वेगाने केली जाईल, अशी माहिती उद्योगमंत्री डॉ. उदय सामंत (Dr. Uday Samant) यांनी विधानसभेत दिली.
हिंजवडीतून काही आयटी कंपन्या स्थलांतर होत असल्याची बाब मांडण्यात आली. स्थलांतर रोखण्यासाठी पुरंदर तालुक्यातील दिवे, कोडीत आणि चांबळी परिसरातील गायरान जमीन आयटी पार्कसाठी हस्तांतरित करण्याबाबत शासनाची भूमिका काय? अशी लक्षवेधी सूचना आमदार विजय शिवतारे यांनी विधानसभेत मांडली.
या वेळी झालेल्या चर्चेत राज्यमंत्री इंद्रनील नाईक यांनीही सहभाग घेऊन सांगितले, पुरंदर हा आयटी पार्कसाठी योग्य पर्याय आहे. २०२५ मध्ये उद्योग विभागाच्या बैठकीत याबाबत प्राथमिक निर्णय घेतला होता.त्यानुसार १५ ऑक्टोबर २०२५ला प्रस्ताव प्राप्त झाला असून, २७ फेब्रुवारी २०२६ मध्ये उद्योग विभाग व महाराष्ट्र औद्योगिक विकास महामंडळ यांनी महसूल विभागाकडे ५७२ हेक्टर जमीन हस्तांतरित करण्याची मागणी केली आहे.
ही जमीन शासनाची असल्याने खर्चही कमी होईल. यासाठी महसूल विभागाने मंत्रिमंडळासमोर प्रस्ताव मांडणे आवश्यक असून, मंत्रिमंडळाची मंजुरी मिळताच पुढील प्रक्रिया तातडीने पूर्ण केली जाईल, असेही राज्यमंत्री नाईक यांनी सांगितले.
