वारकरी संप्रदायाचा बुरखा पांघरून एका वासनांध कीर्तनकाराने गेल्या पाच वर्षांपासून एका अल्पवयीन मुलीचे लैंगिक शोषण केल्याची अंगावर शहारे आणणारी घटना समोर आली आहे.
अहिल्यानगर जिल्ह्यातील पारनेर तालुक्यातील ढवळीपुरी गावात हा संतापजनक प्रकार घडला असून, आरोपीने पीडितेवर केवळ अत्याचारच केले नाहीत, तर तिला गरम लोखंडी पक्कडीने चटके देऊन अमानुष मारहाणही केली आहे.
ढवळीपुरी येथील ‘श्री दुर्गादेवी वारकरी शिक्षण संस्थेचा’ अध्यक्ष आणि कीर्तनकार यशवंत एकनाथ थोरात उर्फ अण्णासाहेब गुंजाळ (वय 38) याने एका 17 वर्षीय मुलीवर वारंवार बलात्कार केला. पीडित मुलगी आठवीत असल्यापासून (2021) हा छळ सुरू होता. आरोपी हा पीडितेचा शेजारी असल्याने आणि पीडितेचा भाऊ त्याच्याच संस्थेत सचिव असल्याने दोन्ही कुटुंबांचे घरोब्याचे संबंध होते. याच विश्वासाचा फायदा घेऊन आरोपीने हे कुकृत्य केले.
कधी आणि कसे घडले?
घटनेचा सिलसिला 2021 पासून सुरू झाला. जेव्हा मुलगी घरी एकटी असे, तेव्हा आरोपी तिच्यावर बळजबरी करायचा. पीडितेने विरोध केल्यास “मी दोन हाफ मर्डर केले आहेत, कोणाला काही सांगितले तर तुझ्या कुटुंबाला संपवून टाकीन,” अशी धमकी तो द्यायचा.
10 मार्च 2026 रोजी क्रूरतेचा कळस
आरोपीने पीडितेला फोन करून घरी बोलावले. तिने येण्यास नकार दिल्यावर कुटुंबाला मारण्याची धमकी दिली. भीतीपोटी पीडिता त्याच्या घरी गेली असता, उशिरा आल्याच्या रागातून आरोपीने तिला बांबूने बेदम मारहाण केली. एवढ्यावरच न थांबता, नराधम यशवंत थोरातने स्वयंपाकाची लोखंडी पक्कड गॅसवर गरम करून पीडितेच्या अंगावर चटके दिले आणि त्यानंतर पुन्हा तिच्यावर अत्याचार केला.
का उघडकीस आला गुन्हा?
मारहाण आणि चटक्यांमुळे पीडितेची प्रकृती खालावली होती, तिला चालणेही कठीण झाले होते. 14 मार्च रोजी जेव्हा तिचा भाऊ घरी आला, तेव्हा तिची अवस्था पाहून त्याने तिला विश्वासात घेतले. तेव्हा पीडितेने गेल्या पाच वर्षांपासून सोसलेला हा नरकयातनांचा प्रवास कथन केला. बहिणीवर झालेला अन्याय ऐकून भावाने तात्काळ पोलिसांत धाव घेतली.
कोणी केली कारवाई?
पारनेर पोलिसांनी या घटनेचे गांभीर्य ओळखून 15 मार्च 2026 (रविवार) रोजी पहाटे चार वाजता आरोपी यशवंत थोरात याच्या मुसक्या आवळल्या. आरोपीवर भारतीय न्याय संहिता (BNS) आणि बाल लैंगिक अत्याचार प्रतिबंधक कायदा (POCSO) अंतर्गत विविध कलमान्वये गुन्हा दाखल करण्यात आला आहे.
सद्यस्थिती आणि कारवाई
पोलीस कोठडी: आरोपीला न्यायालयात हजर केले असता, न्यायालयाने त्याला 20 मार्च 2026 पर्यंत पोलीस कोठडी सुनावली आहे. एका प्रतिष्ठित वारकरी शिक्षण संस्थेच्या अध्यक्षाने असे अघोरी कृत्य केल्यामुळे संपूर्ण जिल्ह्यात संतापाची लाट आहे. ग्रामस्थांनी या ‘भोंदू’ महाराजावर कठोरतम कारवाई करण्याची मागणी केली आहे.
धर्माच्या आणि अध्यात्माच्या नावाखाली चालणाऱ्या अशा विकृत प्रवृत्तींमुळे समाजातील विश्वासाला तडा जात आहे. पारनेर पोलीस आता या प्रकरणात अधिक सखोल तपास करत असून, आरोपीने इतर कोणाशी असे कृत्य केले आहे का, याचाही शोध घेतला जात आहे.
