एकीकडे धर्माच्या नावावर वाद होत असताना, छत्रपती संभाजीनगर जिल्ह्यातील लासूर स्टेशन येथे माणुसकी आणि जातीय सलोख्याचे एक हृदयस्पर्शी उदाहरण पाहायला मिळाले.एका दुचाकी गॅरेजला लागलेल्या भीषण आगीच्या ज्वाळांमधून मुस्लिम बांधवांनी स्वतःच्या प्राणाची पर्वा न करता भगवान शंकराची मूर्ती सुरक्षित बाहेर काढली.
या घटनेचा व्हिडिओ सध्या सोशल मीडियावर मोठ्या प्रमाणात व्हायरल होत असून, या तरुणांच्या कृत्याचे सर्वत्र कौतुक होत आहे. हिंदू-मुस्लीम एकीच्या दर्शनाने नेटिझन्सही सुखावले आहेत.नेमकं काय घडलं?छत्रपती संभाजीनगर जिल्ह्यातील लासूर स्टेशन परिसरातील मुख्य रस्त्यावर संतोष काळे यांचे पूजा ऑटो पार्ट नावाचे दुचाकी दुरुस्तीचे गॅरेज आहे.
सकाळी ६:३० वाजेच्या सुमारास या गॅरेजला अचानक आग लागली. आगीने रौद्ररूप धारण केल्यामुळे गॅरेजमधील ऑईल, टायर आणि इतर महागडे सुटे भाग जळून खाक होऊ लागले.महादेवाची मूर्ती श्रद्धेने बाहेर काढलीआगीचे लोट लांबूनच दिसत होते. पहाटेची नमाज अदा करून मशिदीतून बाहेर पडलेल्या मुस्लिम तरुणांनी आगीचे लोट पाहिले.
परिस्थितीचे गांभीर्य ओळखून हे तरुण क्षणाचाही विलंब न लावता घटनास्थळी पोहोचले. त्यांनी तातडीने दुकानाचे शटर उचकटले आणि आत अडकलेले साहित्य बाहेर काढण्यास सुरुवात केली. विशेष म्हणजे, आगीच्या विळख्यात असलेल्या भगवान शंकराची मूर्ती या तरुणांनी मोठ्या श्रद्धेने आणि सुरक्षितपणे बाहेर काढली.
अन् मोठा अनर्थ टळला….हिंदू-मुस्लिम बांधवांनी एकत्र येऊन केलेल्या या प्रयत्नांमुळे आग आजूबाजूच्या दुकानांपर्यंत पसरण्यापासून रोखण्यात यश आले. शॉर्ट सर्किटमुळे ही आग लागल्याचा प्राथमिक अंदाज वर्तवण्यात येत आहे.
या आगीत संतोष काळे यांचे लाखो रुपयांचे आर्थिक नुकसान झाले असले, तरी या मुस्लिम तरुणांनी दाखवलेल्या तत्परतेमुळे एक मोठा अनर्थ टळला आहे. संकटाच्या वेळी धावून येणारा हाच खरा माणुसकीचा धर्म, अशी भावना परिसरात व्यक्त केली जात आहे.
