पुणे | प्रतिनिधी
देशाच्या ७७ व्या प्रजासत्ताक दिनानिमित्त पुण्यातील आंबेगाव पठार व भारती विद्यापीठ परिसरात देशभक्ती, राष्ट्रीय एकात्मता आणि नीतीमूल्यांचा जागर करणारी भव्य ‘भारत माता पदयात्रा व रथयात्रा’ मोठ्या उत्साहात पार पडली.
हा उपक्रम नगरसेविका सौ. प्रतिभाताई रोहिदास चोरघे यांच्या संकल्पनेतून राबविण्यात आला.
२६ जानेवारी २०२६ रोजी सायंकाळी ४ वाजता या पदयात्रेला प्रारंभ झाला. पदयात्रेमध्ये रथातून भारत माता, छत्रपती शिवाजी महाराज व डॉ. बाबासाहेब आंबेडकर यांच्या फोटो व मूर्तींची भव्य रथयात्रा काढण्यात आली होती.
तिरंगा ध्वज, देशभक्तीपर घोषणाबाजी आणि ढोल-ताशांच्या गजरात संपूर्ण परिसर देशभक्तीमय वातावरणात न्हाऊन निघाला होता.
शिवरायांच्या पुतळ्यापासून पदयात्रेला प्रारंभ
पदयात्रेची सुरुवात छत्रपती शिवाजी महाराज पुतळा, भारती विद्यापीठ कॅम्पस येथून करण्यात आली. शिवरायांना अभिवादन करून ही पदयात्रा सरहद कॉलेज, चंद्रभागा चौक, त्रिमूर्ती चौक, जिजामाता चौक, चिंतामणी शाळा, साईसिद्धी चौक या मार्गाने मार्गक्रमण करत राम मंदिर, आंबेगाव पठार येथे पोहोचली.
राम मंदिरात भारत मातेची भावपूर्ण आरती
पदयात्रा व रथयात्रेचा समारोप आंबेगाव पठारावरील राम मंदिर येथे करण्यात आला. याठिकाणी भारत मातेची भावपूर्ण आरती करण्यात आली. उपस्थित नागरिकांनी मोठ्या भक्तिभावाने या आरतीत सहभाग घेतला.
डॉ. प्रवीण दभडगावकर यांचे मार्गदर्शन
आरतीनंतर डॉ. प्रवीण दभडगावकर
(प्रांत कार्यवाह, राष्ट्रीय स्वयंसेवक संघ – पश्चिम महाराष्ट्र प्रांत)
यांनी उपस्थित नागरिकांना मार्गदर्शन केले.
यावेळी त्यांनी शिष्टाचाराचे नियम, नीतीमूल्यांचे पालन, स्वच्छतेचे महत्त्व, सामाजिक जबाबदारी तसेच हिंदुराष्ट्र घडवण्यासाठी प्रत्येक नागरिकाने स्वतःपासून कशी सुरुवात करावी या विषयांवर सखोल व प्रेरणादायी विचार मांडले.
रोहिदास (बापू) चोरघे यांनी दिली १० नीतीमूल्यांची शपथ
डॉ. दभडगावकर यांच्या भाषणानंतर श्री. रोहिदास (बापू) चोरघे यांनी उपस्थित नागरिकांना १० नीतीमूल्यांची शपथ दिली.
यामध्ये नागरिकांनी पुढील बाबींची शपथ घेतली —
- मी रस्त्यावर थुंकणार नाही
- मी ट्रॅफिक नियम मोडणार नाही
- वाहन चालवताना मोबाईल वापरणार नाही
- मी प्लास्टिकचा वापर करणार नाही
- मी कोणतेही व्यसन करणार नाही
- मी प्रत्येकाशी सौजन्याने वागेन
- मी भारतीय संविधानाचा सन्मान करेन
- मी आई, बहीण व ज्येष्ठांचा आदर करेन
- घरातील किमान एक वेळचे जेवण कुटुंबासमवेत करेन
- जेवताना सर्व मोबाईल बंद ठेवेन
- जेवणानंतर अर्धा तास शतपावली करेन
- कुटुंबासोबत संवाद साधून रात्री १० वाजता झोपेन
या शपथेमुळे उपस्थित नागरिकांमध्ये सकारात्मक आणि प्रेरणादायी वातावरण निर्माण झाले.
विकासाबाबत ठाम शब्द
यावेळी रोहिदास (बापू) चोरघे यांनी
“प्रभाग क्रमांक ३८ चा संपूर्ण विकास करून दाखवू. विकास करताना एक रुपयाचीही अफरातफर होऊ देणार नाही,” असा ठाम शब्द नागरिकांना दिला.
त्यांच्या या वक्तव्याला उपस्थितांनी टाळ्यांच्या गजरात दाद दिली.
मोठ्या प्रमाणावर नागरिकांचा सहभाग
या कार्यक्रमाला आंबेगाव पठार व भारती विद्यापीठ परिसरातील मोठ्या प्रमाणावर नागरिकांनी उत्स्फूर्त सहभाग नोंदवला. युवक, महिला तसेच ज्येष्ठ नागरिकांची उपस्थिती लक्षणीय होती.
प्रमुख आयोजकांची भूमिका
या कार्यक्रमाच्या यशस्वी आयोजनासाठी
सोपान चोरघे, सागर मोझर, बाळकृष्ण भोसले व दत्ता वीर
यांनी प्रमुख आयोजक म्हणून महत्त्वाची भूमिका बजावली. कार्यक्रमाचे नियोजन, मार्गक्रमणाची व्यवस्था, शिस्त आणि समारोपाची आखणी अतिशय सुनियोजित पद्धतीने पार पाडण्यात आली.
मान्यवरांची उपस्थिती
या कार्यक्रमाला प्रमुख पाहुणे म्हणून
डॉ. प्रवीण दभडगावकर
(प्रांत कार्यवाह, राष्ट्रीय स्वयंसेवक संघ – पश्चिम महाराष्ट्र प्रांत)
यांची प्रमुख उपस्थिती लाभली.
तसेच
प्रभाग क्रमांक ३८ चे नगरसेवक संदीप बेलदरे,
डॉ. संजय जगताप,
भिलारेवाडीचे माजी सरपंच माऊली भिलारे
हेही यावेळी उपस्थित होते. मान्यवरांच्या उपस्थितीमुळे कार्यक्रमाचे महत्त्व अधिक वाढले.
समारोप व स्नेहभोजन
राम मंदिर, आंबेगाव पठार येथे यात्रेचा समारोप करण्यात आला. यावेळी प्रजासत्ताक दिनाचे महत्त्व, संविधानाची मूल्ये, देशप्रेम व सामाजिक एकात्मता याविषयी उपस्थितांना संदेश देण्यात आला.
कार्यक्रमाच्या समारोपानंतर सर्व सहभागींसाठी स्नेहभोजनाची व्यवस्था करण्यात आली होती.
यात्रा पूर्णपणे शांततेत, शिस्तीत आणि कोणताही अनुचित प्रकार न घडता पार पडली.
