मुंबईतील वांद्रे कुर्ला कॉम्प्लेक्स (बीकेसी) येथील मेट्रो स्टेशनवर आज पहाटे एक मोठा अपघात घडला. मेट्रोचा एक बीम खांबावर चढवला जात असताना, तो संपूर्ण बीम कोसळला.
बीम उचलण्यासाठी वापरण्यात आलेली मोबाईल क्रेनही उलटली. सुदैवाची गोष्ट म्हणजे, या अपघातात कोणीही जखमी झाले नाही. सध्या बीम काढून क्रेन पुन्हा बसवण्याचे काम सुरू आहे.
मिळालेल्या माहितीनुसार, बीकेसी येथील मेट्रोच्या साईटवर पिलरच्या वर बीम बसवण्याचे काम सुरू होते. एका मोठ्या ‘मोबाईल क्रेन’च्या सहाय्याने हा बीम उचलून पिलरवर ठेवला जात होता. मात्र, बीम पिलरवर स्थिर करण्यापूर्वीच तो क्रेनच्या नियंत्रणातून सुटला आणि प्रचंड आवाजासह जमिनीवर कोसळला. बीम इतका जड होता की, त्याचा भार सहन न झाल्यामुळे तो उचलणारी मोबाईल क्रेनही जागीच उलटली.
घटनास्थळाच्या समोर आलेल्या फोटोंमध्ये क्रेन हवेत अधांतरी लटकलेली आणि जड बीम जमिनीवर ढिगाऱ्याच्या रूपात पडलेले दिसत आहेत. अपघातानंतर लगेचच मेट्रो प्रशासन आणि बचाव पथके घटनास्थळी दाखल झाली. दिलासादायक बाब म्हणजे या घटनेत कोणताही कामगार किंवा वाटसरू जखमी झाला नाही.
कमी वर्दळीच्या वेळी घडली घटनाबीकेसीचा हा असा परिसर आहे जिथे दिवसभर हजारो लोक आणि वाहनांची वर्दळ असते, त्यामुळे पहाटे झालेला हा अपघात चमत्कारापेक्षा कमी मानला जात नाही. अपघातानंतर लगेचच संपूर्ण परिसरात घबराट पसरली. जवळचे लोक आणि कामगार सुरक्षित ठिकाणी पळून गेले.
प्राथमिक अहवालानुसार, कोणतीही जीवितहानी झाल्याची पुष्टी झालेली नाही, मात्र अधिक तपशील अपेक्षित आहे. हा अपघात पहाटेच्या वेळी घडला. त्यामुळे यावेळी परिसरात वाहतूक आणि नागरिकांची वर्दळ अत्यंत कमी होती. जर ही घटना दिवसा किंवा गर्दीच्या वेळी घडली असती, तर मोठा अनर्थ ओढवला असता. सुदैवाने क्रेन चालक आणि तिथे कार्यरत असलेले मजूर यातून सुखरूप बचावले आहेत.
दुरुस्तीचे काम युद्धपातळीवरअपघातानंतर मेट्रो प्रशासनाकडून तातडीने हालचाली सुरू करण्यात आल्या आहेत. कोसळलेला बीम रस्त्यावरून हटवण्यासाठी आणि उलटलेली क्रेन पुन्हा उभी करण्यासाठी घटनास्थळी जादा यंत्रणा तैनात करण्यात आली आहे.
या अपघातामुळे मेट्रो कामाच्या सुरक्षिततेवर पुन्हा एकदा प्रश्नचिन्ह उपस्थित केले जात आहेत .एमएमआरडीएनेया घटनेची चौकशी करण्याचे आदेश दिले आहेत. क्रेनची क्षमता अपुरी होती की तांत्रिक बिघाडामुळे हा अपघात झाला, हे निश्चित केले जाईल. बांधकाम स्थळावर सुरक्षा नियमांकडे दुर्लक्ष करण्यात आले, असा आरोप स्थानिक रहिवाशांनी केला आहे.
