शहरातील चंदननगर परिसरात अफेअरच्या संशयातून एका महिलेचा अत्यंत क्रूरपणे खून केल्याची धक्कादायक घटना उघडकीस आली आहे. विशेष म्हणजे, हा खून थेट वकिलाच्या ऑफिसमध्ये घडल्याने एकच खळबळ उडाली आहे.
पोलिसांनी वेगाने तपास करत अवघ्या सहा तासांत आरोपींना अटक केली आहे. तांत्रिक तपास, सीसीटीव्ही फुटेज हे दोन क्ल्यू या परिस्थितीत निर्णायक ठरलेवकिलाच्या बायकोला संशयमिळालेल्या माहितीनुसार, पूनम दिनेश मून (वय ३९, रा. गणेशनगर, येरवडा) हिचे अॅड. संजय सावंत यांच्यासोबत प्रेमसंबंध असल्याचा संशय सावंत याची पत्नी स्वाती सावंत हिला होता.
या संशयातूनच स्वाती सावंत, तिची मुलगी आणि स्वतः अॅड. संजय सावंत यांनी संगनमत करून पूनम मून हिचा खून करण्याचा कट रचला.दिनांक १६ एप्रिल दुपारी २ वाजल्यापासून ते १७ एप्रिल सकाळी ११ वाजेपर्यंतच्या कालावधीत चंदननगरमधील जुना मुंढवा रोडवरील अॅड. सावंत यांच्या ऑफिसमध्ये ही घटना घडली.
आरोपींनी आधी पूनम मून हिचे पाय दोरीने बांधले. त्यानंतर तिच्यावर निर्दयपणे हल्ला करत बॅटने तसेच धारदार शस्त्राने डोक्यावर आणि तोंडावर वार केले. या मारहाणीत ती गंभीर जखमी झाली आणि तिचा जागीच मृत्यू झाला.
या घटनेनंतर आरोपींनी पुरावे नष्ट करण्याचाही प्रयत्न केल्याची माहिती समोर येत आहे. मात्र, घटनेची माहिती मिळताच चंदननगर पोलिसांनी तत्काळ तपासाची चक्रे फिरवली. तांत्रिक तपास, सीसीटीव्ही फुटेज आणि माहितीच्या आधारे पोलिसांनी अल्पावधीतच आरोपींचा माग काढला.
या प्रकरणी चंदननगर पोलीस ठाण्यात खुनाचा गुन्हा दाखल करण्यात आला असून, अॅड. संजय सावंत आणि त्यांच्या मुलीला पोलिसांनी ताब्यात घेतले आहे. तर मुख्य महिला आरोपी स्वाती सावंत हिला गुन्हे शाखेच्या खंडणी विभाग-२ पथकाने अटक केली आहे.
चौकशीदरम्यान आरोपींनी गुन्ह्याची कबुली दिल्याचे पोलिसांनी सांगितले.या गुन्ह्याचा तपास सहा पोलीस आयुक्त नुतन पवार यांच्या मार्गदर्शनाखाली सुरू आहे. वरिष्ठ पोलीस निरीक्षक निलेश बडाख आणि त्यांच्या पथकाने ही कामगिरी पार पाडली.
दरम्यान, वैयक्तिक संशय आणि कौटुंबिक वादातून एवढ्या टोकाचा निर्णय घेतल्याने परिसरात भीती आणि संतापाचे वातावरण पसरले आहे. कायद्याचा धाक न बाळगता थेट खून केल्याने नागरिकांमध्येही चिंता व्यक्त केली जात आहे.
