वकील पतीसोबत अनैतिक संबंधाच्या संशयावरून वकिलाच्या पत्नीने त्यांच्या कार्यालयात सहायक म्हणून नोकरी करणाऱ्या महिलेचा खून केल्यानंतर बॉडीची विल्हेवाट लावण्याचा केलेला फसला.
दरम्यान, वकिलाच्या पत्नीने संबंधित महिलेच्या डोळ्यांत झुरळ मारण्याचे औषध फवारले, पाय बांधून डोक्यात बॅट घातली आणि तोंडावर कोयत्याने एकापाठोपाठ ५६ वार करून अत्यंत क्रूरपणे खून केला. खून केल्यानंतर शवाची विल्हेवाट लावण्यासाठी दोन पोती आणून त्यात भरण्याचा प्रयत्न केला; पण वजनामुळे शक्य झाले नाही आणि आरोपी फरारी झाले.
दाम्पत्याला अटक
पूनम दिनेश मून (वय ३५, रा. येरवडा) असे मृत महिलेचे नाव आहे. या प्रकरणी पती दिनेश मून यांनी फिर्याद दिली आहे. त्यावरून ॲड. संजय सावंत (वय ४३) आणि स्वाती सावंत (वय ४३, रा. आनंद पार्क, वडगाव शेरी) यांना अटक केली आहे. न्यायालयाने आरोपी पती- पत्नीला २२ एप्रिलपर्यंत पोलिस कोठडी सुनावली आहे.
सावंत यांच्या अल्पवयीन मुलीला पोलिसांनी ताब्यात घेतले आहे.अनैतिक संबंधांचा संशयचंदननगर परिसरात आरोपी ॲड. सावंत याचे कार्यालय आहे. पूनम मून साडेतीन वर्षांपासून सावंत याच्या कार्यालयात सहायक म्हणून नोकरीला होती. ॲड. सावंत आणि पूनम मून यांच्यात अनैतिक संबंध असल्याचा संशय आरोपी स्वाती सावंत हिला होता.
गुरुवारी (१६ एप्रिल) मून नेहमीप्रमाणे कामावर आल्या होत्या. आरोपी स्वाती आणि तिची अल्पवयीन मुलगी दुपारी तीन वाजण्याच्या सुमारास पतीच्या कार्यालयात आले.त्या वेळी अनैतिक संबंधाच्या कारणावरून स्वाती सावंत हिने पूनम मून यांच्याशी वाद सुरू केला. वाद प्रचंड विकोपाला गेल्यावर स्वाती सावंत हिने झुरळ मारणारे औषध मून यांच्या डोळ्यावर मारले. त्यांनतर लाकडी बॅटने डोक्यात घालून जखमी केले. या दरम्यान कार्यालयातील कोयत्याने तिच्या तोंडावर एकापाठोपाठ ५६ वार करून खून केला.
बॉडीची विल्हेवाट लावण्याचा प्रयत्न फसला
खून केल्यानंतर बॉडीची विल्हेवाट लावण्यासाठी आरोपींनी हालचाल सुरू केली. स्वाती सावंत हिने त्यासाठी दोन प्लास्टिकची पोती आणून त्यात शव भरून विल्हेवाट लावण्याचा प्रयत्न केला; पण वजनामुळे शक्य झाले नाही. त्यामुळे आरोपी बॉडी कार्यालयात सोडून नातेवाइकांकडे निघून गेले. पूनम मून यांचा खून झाला, त्या दिवशी ॲड. सावंत मुंबईत असल्याचे पोलिसांकडून सांगण्यात आले. ॲड. संजय सावंत आणि स्वाती सावंत यांनी कट रचून पूनम मून हिचा अत्यंत क्रूर पद्धतीने खून केल्याचे पोलिस तपासात निष्पन्न झाले आहे.
