बाणेरमधील सर्व्हे क्रमांक ५१ व ५२ येथील बाणेर-सूस रस्त्यावरील बीडीपी झोनमधील, तसेच इमारतीचे फ्रंट व साइड मार्जिनमधील अनधिकृत हॉटेल, पत्रा शेड व पक्क्या स्वरूपाच्या अनधिकृत बांधकामांवर महापालिकेच्या बांधकाम विकास विभाग झोन ३ यांच्यामार्फत पोलिस कर्मचाऱ्यांच्या मदतीने कारवाई करण्यात आली.
या कारवाईमध्ये सुमारे २०,५०० चौरस फूट विनापरवाना अनधिकृत क्षेत्र हटविण्यात आले. परिसरातील अनधिकृत बांधकाम, तसेच अतिक्रमणांबाबत महापालिका प्रशासनाकडे तक्रारी प्राप्त झाल्या होत्या.
कारवाईत महापालिकेचे अधिक्षक अभियंता, बांधकाम विभाग झोन क्रमांक ३ चे कार्यकारी अभियंता यांच्या मार्गदर्शनाखाली उपअभियंता, कनिष्ठ अभियंता व सहाय्यक पोलिस निरीक्षक यांच्या पथकाने व दोन जेसीबी, एक गॅस कटर, दहा अतिक्रमण कर्मचारी यांच्या मदतीने कारवाई पूर्ण करण्यात आली. कारवाईच्या वेळी पोलिसांनी चोख बंदोबस्त ठेवला होता.
