विश्रांतवाडीतील डॉ. बाबासाहेब आंबेडकर चौकातील उड्डाणपूल व समतल विलगकाचे (ग्रेड सेपरेटर) काम पालखी सोहळ्यापूर्वी पूर्ण होण्याची शक्‍यता कमी आहे. वाहतूक कोंडीमुळे कामावर येणाऱ्या मर्यादेबरोबरच अन्य विविध कारणांमुळे ही कामे संथ गतीने सुरू आहेत.विशेषतः संत ज्ञानेश्‍वर महाराज पालखी सोहळा याच मार्गाने पुढे जातो, त्यामुळे किमान त्यापूर्वी तरी ही कामे मार्गी लागणार का, असा प्रश्‍न आता निर्माण झाला आहे.
डॉ. आंबेडकर चौकातील कोंडी फोडण्यासाठी तेथे उड्डाणपूल व समतल विलगक तयार करण्याचे महापालिकेने निश्‍चित केले होते. ही कामे पूर्ण झाल्यानंतर आळंदी रस्ता, धानोरी व विमानतळ रस्त्याकडे जाणाऱ्यांचा मार्ग सुकर होणार आहे. संबंधित प्रकल्पाच्या कामास २०२४ मध्ये सुरुवात झाली असून, ६३ कोटी रुपये खर्चाच्या या प्रकल्पाद्वारे ‘वाय’ आकाराचा उड्डाणपूल तयार केला जाणार आहे.
त्यापैकी विमानतळाकडून विश्रांतवाडी चौकाकडे येणाऱ्या पुलाचे तसेच समतल विलगकाचे काम झाले असून, प्रकल्पातील ६५ टक्के काम आत्तापर्यंत पूर्ण झाले आहे, तर उर्वरित काम संथगतीने सुरू आहे.संत ज्ञानेश्‍वर महाराज यांचा पालखीसोहळा आळंदीतून विश्रांतवाडीमार्गे पुढे पुणे शहराकडे मार्गस्थ होतो.
लाखोंच्या संख्येने वारकरी या मार्गाने वारीच्या माध्यमातून पंढरपूरला जातात. त्यामुळे यंदाच्या पालखी सोहळ्यापूर्वी डॉ. चौकातील कामे पूर्ण होणे गरजेचे आहे. मात्र, येणाऱ्या विविध अडचणींमुळे ही कामे पालखी सोहळ्यापूर्वी पूर्ण होईल का, असा प्रश्‍न उपस्थित होत आहे.
उड्डाणपुलाची वैशिष्ट्ये (सर्व आकडे मीटरमध्ये)
एकूण लांबी ६३०.१२
एकूण रुंदी ७
आळंदीच्या बाजूकडील पुलाची लांबी १९७.१२
लोहगावच्या बाजूकडील पुलाची लांबी १४२
