भिगवण येथील कथित मुलीच्या अपहरणात प्रकरणात आता नवा ट्विस्ट आला आहे. या प्रकरणातील मुलीने आता आईकडे जाण्याची इच्छा व्यक्त केली आहे. इंदापूर कोर्टात व्हिडीओ कन्फरन्सिंगद्वारे मुलीने हजेरी लावली.
यावेळी मुलीने आपल्या आईकडे जाण्याची इच्छा व्यक्त केली आहे. विशेष म्हणजे दोन दिवसांपूर्वीच मुलीने मुलाकडे जाण्याची इच्छा व्यक्त केली होती. त्यानंतर आता मुलीने आपला जबाब बदलला आहे. मुलीने आता आईकडे जाण्याची इच्छा व्यक्त केली आहे.दरम्यान, याआधी मुलीला बारामती कोर्टात हजर करण्यात आलं होतं. तिला 5 दिवस पुनर्वसन केंद्रात ठेवण्यात आलं. यानंतर तिला आज व्हिसीद्वारे कोर्टात हजर करण्यात आलं. यावेळी तिने आईकडे जाण्याची इच्छा व्यक्त केली.
वकील काय म्हणाले?
“या प्रकरणी आम्ही फिर्यादी म्हणजे मुलीच्या आईच्या मार्फत वकीलपत्र दाखल करुन हजर झालो. त्यावेळेस मुलगी व्हिडीओ कॉन्फरन्सिंगद्वारे कोर्टात हजर झाली. कोर्टाने तिला तिची संमती विचारली असता, तिने आई आणि मामासोबत जाण्याची इच्छा व्यक्त केली. त्यानुसार कोर्टाने आई आणि मामा यांच्याकडे देण्याबाबत आदेश पारित केलेला आहे. आई आणि मामा वेगवेगळ्या ठिकाणी राहतात. मुलगी सध्या सुधारणगृहात आहे. तसा आदेश त्यांच्याकडे जाईल त्यानंतर मुलगी आई आणि मामांकडे देण्यात येईल”, अशी प्रतिक्रिया मुलीच्या आईच्या बाजूने कोर्टात युक्तीवाद करणाऱ्या वकिलांनी सुनावणीनंतर दिली.
नेमकं प्रकरण काय?
पुणे जिल्ह्यातील भिगवण बाजारपेठेतून 21 वर्षीय तरुणीचे अपहरण झाल्याच्या कथित घटनेने काही दिवसांपूर्वी मोठी खळबळ उडाली होती. लग्न अवघ्या दोन दिवसांवर असताना आई आणि भावासोबत खरेदी करून घरी परतत असताना अज्ञातांनी तिचे अपहरण केल्याचा आरोप करण्यात आला होता. यावेळी तिच्या आई व भावाच्या डोळ्यात मिरची पूड टाकल्याचाही दावा करण्यात आला होता. या घटनेनंतर संतप्त नागरिकांनी पुणे-सोलापूर राष्ट्रीय महामार्ग रोखत आंदोलन केले, तसेच भिगवण बंदलाही उत्स्फूर्त प्रतिसाद मिळाला होता.
मात्र या प्रकरणाला नंतर मोठा ट्विस्ट मिळाला. संबंधित तरुणीचा एक व्हिडिओ समोर आला, ज्यामध्ये तिने अपहरण झाल्याचा आरोप फेटाळून लावत संबंधित तरुणासोबत आपल्या मर्जीने गेल्याचे सांगितले. आमचे एकमेकांवर प्रेम असून मी स्वेच्छेने त्याच्यासोबत आले, असेही तिने स्पष्ट केले होते. त्यानंतर दोघेही पोलिसांसमोर हजर झाले होते.
दरम्यान, तरुणीला जबाब नोंदवण्यासाठी बारामती येथील न्यायालयात व्हिडिओ कॉन्फरन्सिंगद्वारे हजर करण्यात आले. आईसोबत जाण्यास ती सुरुवातीला तयार नसल्याने तिची सुधारगृहात रवानगी करण्यात आली होती. पाच दिवसांनंतर झालेल्या सुनावणीत न्यायालयाने विचारणा केली असता, तरुणीने आई व मामाकडे जाण्याची इच्छा व्यक्त केली. तिच्या या जबाबामुळे प्रकरणाला आता नवे वळण मिळाले असून पुढील निर्णयाकडे सर्वांचे लक्ष लागले आहे.
