पुणे मेट्रो प्रकल्पासाठी सिमेंट, स्टील पुरवठ्यासाठी भांडवली गुंतवणूक केल्यास जादा नफा देण्याचे आमिष दाखवून दोघांनी एका दांपत्याची तीन कोटी ७८ लाख रुपयांची फसवणूक केल्याचा प्रकार समोर आला आहे.याप्रकरणी लोणी काळभोर पोलिस ठाण्यात दोघांविरुद्ध गुन्हा दाखल करण्यात आला आहे.
याबाबत एका महिलेने (वय ४२, रा. कृषितंत्र विद्यालय परिसर, मांजरी बुद्रूक) यांनी फिर्याद दिली आहे. संतोष सुरेश काकडे (रा. राहीज वस्ती, लोणी काळभोर) आणि अतुल शामराव पवार (रा. खिलारवाडी, नळस्टॉप, पुणे) अशी गुन्हा दाखल झालेल्या संशयितांची नावे आहेत.
पोलिसांनी दिलेल्या माहितीनुसार, हा प्रकार १४ सप्टेंबर २०२० ते डिसेंबर २०२४ या कालावधीत लोणी काळभोर परिसरात घडला. आरोपींनी तक्रारदार आणि त्यांच्या पतीला पुणे मेट्रो कंपनीला सिमेंट आणि स्टील पुरवठ्यासाठी भांडवली गुंतवणूक करण्यास प्रवृत्त केले.
गुंतवणुकीवर मोठा नफा व खात्रीशीर परतावा देण्याचे आश्वासन देत त्यांनी टप्प्याटप्प्याने तीन कोटी ७८ लाख रुपये स्वीकारले.मात्र, एवढी मोठी रक्कम घेतल्यानंतरही दांपत्याला कोणताही नफा किंवा परतावा दिला नाही.
पैशांची मागणी केली असता आरोपींनी तक्रारदारावरच खोटा सावकारीचा गुन्हा दाखल करण्याची धमकी देत शिवीगाळ केल्याचा आरोप तक्रारीत करण्यात आला आहे.या प्रकरणाचा पुढील तपास लोणी काळभोर पोलिस करीत आहेत. त्यांच्या आर्थिक व्यवहारांचे दस्तऐवज आणि बँक व्यवहारांची चौकशी करण्यात येत आहे.
