वाहतूक पोलिसांनी विकसित केलेल्या पुणे ट्रॅफिक ॲप (पीटीपी) उपक्रमाची दखल राष्ट्रीय पातळीवर घेतली गेली आहे. केंद्र सरकारच्या सुशासन आणि डिजिटल इनोव्हेशन क्षेत्रातील प्रतिष्ठेचा समजला जाणारा ‘१०७ वा स्कॉच अवॉर्ड’ पुणे पोलिसांच्या ‘पीटीपी’ अ‍ॅपला जाहीर झाला आहे.येत्या २८ मार्च रोजी नवी दिल्ली येथील ‘इंडिया हॅबिटेट सेंटर’मध्ये एका सोहळ्यात हा पुरस्कार प्रदान केला जाणार आहे.
नागरिक झाले ‘खाकी’ वर्दीविना पोलिसशहरातील सुजाण नागरिक हे देखील ‘खाकी’ वर्दीविना पोलिसच आहेत, या संकल्पनेतून १४ जून २०२५ रोजी हे अ‍ॅप लाँच करण्यात आले होते. पोलिस आयुक्त अमितेश कुमार आणि पोलिस सहआयुक्त रंजनकुमार शर्मा यांच्या मार्गदर्शनाखाली अतिरिक्त पोलिस आयुक्त मनोज पाटील यांनी हे अ‍ॅप विकसित केले आहे.
ओमिनी ब्रीज टेक्नॉलॉजी आणि क्रिश इंट्राट्रेड या कंपन्यांच्या तांत्रिक सहकार्याने हा प्रकल्प राबविण्यात येत आहे.गेल्या आठ महिन्यांत एक लाख ४० हजारांहून अधिक नागरिकांनी हे अ‍ॅप डाऊनलोड केले आहे. नागरिकांनी दोन लाखांपेक्षा जास्त वाहतूक नियमभंगाची माहिती छायाचित्रांसह वाहतूक पोलिसांना पाठवली. या तक्रारींच्या आधारे बेशिस्त वाहनचालकांवर १२ कोटी रुपयांहून अधिक दंड आकारण्यात आला आहे.
केवळ नियमभंगच नाही, तर रस्ते अपघात, वाहनातील बिघाड, खड्डे, तेल गळती, पाणी साचणे आणि झाडे पडणे अशा पाच हजार चारशेहून अधिक समस्यांची माहिती नागरिकांनी कळवली आहे. यापैकी ८० टक्के समस्यांवर पुणे महापालिकेकडून तत्काळ कार्यवाही करण्यात आली आहे.’
स्कॉच’ अवॉर्ड’साठी प्रकल्पाचे सादरीकरण, तज्ज्ञ समितीद्वारे मूल्यांकन आणि देशभरातील नागरिकांचे ऑनलाइन मतदान यांचा समावेश होता. नाविन्यपूर्णता, पारदर्शकता आणि समाजावर झालेला सकारात्मक परिणाम या निकषांवर हे अ‍ॅप सरस ठरले आहे.”या पुरस्कारामुळे पुणे पोलिसांच्या तंत्रज्ञानाधारित उपक्रमांना राष्ट्रीय मान्यता मिळाली आहे. भविष्यातही नागरिकांच्या सहभागातून शहरातील वाहतूक अधिक सुरक्षित आणि शिस्तबद्ध करण्याचा आमचा संकल्प आहे.”
