पाचगणी प्रतिनिधी प्रशांत थोरवे
दि. 29 मार्च 2026 :महाराष्ट्रातील शिक्षण क्षेत्रात उल्लेखनीय कार्य करणाऱ्या शिक्षकांना गौरविण्यासाठी दिला जाणारा अत्यंत प्रतिष्ठेचा “महाराष्ट्र राज्य आदर्श शिक्षक पुरस्कार 2025–2026” यावर्षी सेंट झेवियर्स हायस्कूल, पाचगणी येथील कर्तृत्ववान, उपक्रमशील व समर्पित शिक्षक श्री. शिवाजी जाधव सर यांना प्रदान करण्यात आला. ध्येय फाउंडेशन, महाराष्ट्र तर्फे देण्यात आलेल्या या सन्मानामुळे जाधव सरांच्या कार्याचा राज्यस्तरावर गौरव झाला आहे.
पुणे येथील निगडी परिसरातील ग. दि. माडगुळकर नाट्यगृहात “एज्युकेशन आयकॉन्स समिट – 2026” या भव्य आणि दिमाखदार सोहळ्याचे आयोजन करण्यात आले होते. हा सोहळा रविवार, दिनांक 29 मार्च 2026 रोजी उत्साहपूर्ण वातावरणात संपन्न झाला. या सोहळ्यात आंतरराष्ट्रीय तसेच राष्ट्रपती पुरस्कार विजेते माननीय श्री. दत्तात्रेय वारे गुरुजी यांच्या हस्ते श्री. जाधव सर यांना सन्मानचिन्ह, प्रमाणपत्र व शाल-श्रीफळ देऊन गौरविण्यात आले. उपस्थित मान्यवरांच्या टाळ्यांच्या कडकडाटात जाधव सरांचा सत्कार करण्यात आला.
या राज्यस्तरीय पुरस्कारासाठी महाराष्ट्रातील ३६ जिल्ह्यांमधील प्रत्येक तालुक्यातून केवळ एका आदर्श शिक्षकाची निवड करण्यात आली होती. अत्यंत काटेकोर निवड प्रक्रियेतून महाबळेश्वर तालुक्याचे प्रतिनिधित्व करत श्री. शिवाजी जाधव यांनी आपल्या उत्कृष्ट अध्यापन कौशल्य, विद्यार्थ्यांप्रती असलेली निष्ठा, तसेच शैक्षणिक गुणवत्तावाढीसाठी राबवलेल्या नाविन्यपूर्ण उपक्रमांमुळे मानाचे स्थान पटकावले आहे.
जाधव सर हे खऱ्या अर्थाने उपक्रमशील शिक्षक म्हणून ओळखले जातात. हिंदी व मराठी या दोन्ही भाषांवर त्यांचे उत्कृष्ट प्रभुत्व असून, त्यांनी भाषा शिक्षण अधिक प्रभावी, रंजक आणि जीवनाभिमुख करण्यासाठी विविध नाविन्यपूर्ण उपक्रम राबवले आहेत. कठीण भाषिक संकल्पनाही ते अत्यंत सोप्या, उदाहरणांसह आणि अनुभवाधारित पद्धतीने विद्यार्थ्यांपर्यंत पोहोचवतात. त्यांच्या अध्यापनामुळे विद्यार्थ्यांमध्ये भाषेची गोडी निर्माण होऊन वाचन, लेखन आणि अभिव्यक्ती कौशल्यात लक्षणीय प्रगती होताना दिसते.
विद्यार्थ्यांच्या सर्वांगीण विकासासाठी त्यांनी वाचन प्रेरणा अभियान, निबंध व वक्तृत्व स्पर्धा, साहित्यिक उपक्रम, भाषिक कौशल्य विकास कार्यशाळा, तसेच व्यक्तिमत्व विकास उपक्रमांचे प्रभावी नियोजन केले आहे. त्यांच्या मार्गदर्शनाखालील विद्यार्थी तालुका व जिल्हास्तरीय विविध स्पर्धांमध्ये सातत्याने उल्लेखनीय यश संपादन करत असून, आपल्या गुणवत्तेचा ठसा उमटवत आहेत. त्यांच्या प्रेरणेमुळे अनेक विद्यार्थी आत्मविश्वासाने स्पर्धांमध्ये सहभागी होत यशाच्या शिखराकडे वाटचाल करत आहेत.
नाविन्यपूर्ण उपक्रमांची अंमलबजावणी हे त्यांच्या कार्याचे वैशिष्ट्य ठरले आहे. “शिकत-करत” (Learning by Doing), कथा-कथन, वाचन संस्कृती जोपासणे, तसेच भाषेच्या माध्यमातून संस्कारमूल्ये रुजवण्यावर त्यांनी विशेष भर दिला आहे. त्यामुळे विद्यार्थ्यांमध्ये आत्मविश्वास, सर्जनशीलता आणि प्रभावी अभिव्यक्ती विकसित झाली आहे.
याशिवाय सामाजिक बांधिलकी जपत विविध जनजागृती मोहिमा, पर्यावरण संवर्धन उपक्रम, तसेच समाजोपयोगी प्रकल्प राबवून त्यांनी शिक्षक या भूमिकेपलीकडे जाऊन समाजातही आदर्श निर्माण केला आहे. त्यांच्या या बहुआयामी कार्याची दखल घेत त्यांना हा मानाचा पुरस्कार बहाल करण्यात आला.
या गौरवप्रसंगी सेंट झेवियर्स हायस्कूलचे संस्थापक फादर टोमी सर, प्राचार्य फादर साबू तसेच सहकारी शिक्षकांनी जाधव सरांचे विशेष अभिनंदन करत त्यांच्या कार्याचा अभिमान व्यक्त केला. “त्यांची विद्यार्थ्यांप्रती असलेली निष्ठा, सतत नवनवीन प्रयोग करण्याची वृत्ती आणि शिक्षण क्षेत्रातील योगदान हे सर्वांसाठी प्रेरणादायी आहे,” अशा भावना त्यांनी व्यक्त केल्या.
दरम्यान, या उल्लेखनीय यशाबद्दल श्री. शिवाजी जाधव यांच्या कुटुंबिय, मित्रपरिवार, माजी विद्यार्थी तसेच शिक्षणप्रेमी नागरिकांकडून त्यांच्यावर शुभेच्छांचा वर्षाव होत आहे. त्यांच्या या यशामुळे पाचगणी व महाबळेश्वर तालुक्याच्या शैक्षणिक क्षेत्राचा नावलौकिक अधिकच उंचावला असून, इतर शिक्षकांसाठी ते प्रेरणास्थान ठरत आहेत.
हा पुरस्कार म्हणजे केवळ वैयक्तिक सन्मान नसून, शिक्षण क्षेत्रात प्रामाणिकपणे, नवनिर्मितीची कास धरून कार्य करणाऱ्या प्रत्येक शिक्षकासाठी प्रेरणादायी ठरणारा गौरव आहे. श्री. शिवाजी जाधव यांचे कार्य असेच पुढेही विद्यार्थ्यांच्या उज्ज्वल भवितव्यासाठी आणि समाजाच्या प्रगतीसाठी मार्गदर्शक ठरो, अशीच सर्वांकडून अपेक्षा व्यक्त होत आहे.
