शहरात अत्यंत धक्कादायक अपघाताची घटना समोर आली आहे. परीक्षेहून घरी परतणाऱ्या एका तरुण विद्यार्थ्याचा महापालिकेच्या कचरा वाहणाऱ्या डंपरखाली चिरडून मृत्यू झाला आहे.
ओंकार रायभान खनसे असे मृत विद्यार्थ्याचे नाव असून तो परीक्षेनंतर मोपेडवरून घरी परतत होता. प्रॅक्टिकल परीक्षा दिल्यानंतर काही वेळ मित्रांसोबत घालवून ओंकार मिल कॉर्नरमार्गे छावणीच्या दिशेने निघाला होता.
दरम्यान, बारापुल्ला गेट परिसरात कचरा संकलन करणाऱ्या कंपनीच्या डंपरने त्याला समोरून जोरदार धडक दिली. हा अपघात इतका भीषण होता, की ओंकारचा जागीच मृत्यू झाला. घटनेची माहिती मिळताच छावणी पोलिस घटनास्थळी दाखल झाले.
त्यांनी मृतदेह ताब्यात घेऊन उत्तरीय तपासणीसाठी घाटी रुग्णालयात पाठवला आहे. या दुर्दैवी घटनेमुळे परिसरात हळहळ व्यक्त केली जात असून, नागरिकांकडून रस्ते सुरक्षेबाबत प्रश्न उपस्थित केले जात आहेत.
