उपमुख्यमंत्री अजित पवार यांचं आज विमान अपघातात निधन झालं आहे. या घटनेवर अजित पवार यांचे काका तथा महाराष्ट्राचे ज्येष्ठ नेते शरद पवार यांनी आपली पहिली प्रतिक्रिया दिली आहे. महाराष्ट्राच कधीही न भरुन निघणारं असं नुकसान या घटनेमुळे झालं आहे. तसेच हा निव्वळ अपघात आहे. यात राजकारण नाही, अशी प्रतिक्रिया शरद पवार यांनी दिली आहे. शरद पवार यावेळी खूप भावूक झालेले बघायला मिळाले. त्यांना बोलता देखील येत नव्हतं. तसेच आपण आज मीडियासमोर येणार नव्हतो, असंही शरद पवारांनी आपली प्रतिक्रिया देताना नमूद केलं.
शरद पवार काय म्हणाले?
“महाराष्ट्राचे उपमुख्यमंत्री अजित पवार यांचं अपघाती निधन झालं. महाराष्ट्राला हा प्रचंड मोठा धक्का आहे. एक कर्तृत्वान नेत्याला महाराष्ट्र आज मुकला आहे. हे जे नुकसान झालं ते भरुन निघणारं नाही. मी आज मीडियासमोर येणार नव्हतो. पण काही जणांनी या अपघातामागे काही तरी राजकारण आहे, अशा प्रकारची भूमिका घेतली. याच्यात राजकारण नाही. हा निव्वळ अपघात आहे. त्याच्या यातना महाराष्ट्राला आणि आम्हा सर्वांना होत आहेत. कृपा करुन इथे राजकारण नाही एवढंच सांगायचं आहे”, असं शरद पवार म्हणाले.
अजित पवार यांचं पार्थिव अंत्यदर्शनासाठी विद्या प्रतिष्ठानच्या प्रांगणात
अजित पवार यांचं पार्थिव आता बारामतीत विद्या प्रतिष्ठानच्या मैदानात ठेवण्यात येत आहे. अजित पवार यांना अखेरचं पाहण्यासाठी कार्यकर्त्यांची मोठी गर्दी विद्या प्रतिष्ठानच्या मैदानात जमली आहे. अजित पवार यांना बारामतीच्या मेडिकल कॉलेजमधून विद्या प्रतिष्ठानच्या प्रांगणात नेण्यात येत आहे. रुग्णालयाच्या बाहेर देखील मोठी गर्दी जमली आहे. अजित दादा अमर रहे, अशा घोषणा कार्यकर्त्यांकडून केल्या जात आहेत. अनेक कार्यकर्त्यांचा आक्रोश सुरु आहे. अनेक दिग्गज नेते ढसाढसा रडत आहेत. अजित पवार हे पक्षाचे प्रमुख होते. त्यांनी दाखवलेल्या दिशेकडे पाऊल ठेवून नेते राजकारण करत होते. त्यामुळे आम्ही पोरके झालो, अशी प्रतिक्रिया राष्ट्रवादीचे नेतेमंडळी देताना दिसत आहेत.
