कात्रज : कात्रज परिसरातील मांगडेवाडी येथे अवकाळी पावसामुळे पुणे-सातारा रस्त्यावरील सुरक्षा भिंतीचा काही भाग कोसळला असून रस्त्याचाही काही भाग खचला आहे. त्यामुळे या मार्गावरून जाणाऱ्या वाहनचालकांच्या सुरक्षिततेचा प्रश्न निर्माण झाला आहे.माऊली हॉटेलजवळ घडलेल्या या घटनेमुळे स्थानिक नागरिकांमध्ये चिंतेचे वातावरण आहे.
भिंतीचा उर्वरित भागही कमकुवत झाल्याचे दिसून येत असून पथदिव्याचे खांबही धोकादायक स्थितीत आहेत. विशेषतः रात्रीच्या वेळी अपघात होण्याची शक्यता अधिक असल्याने नागरिकांनी सावधगिरी बाळगण्याचे आवाहन केले आहे.पुणे-सातारा रस्ता हा अत्यंत वर्दळीचा मार्ग असल्याने या ठिकाणी तातडीने दुरुस्तीची आवश्यकता असल्याचे नागरिकांचे मत आहे.
स्थानिक रहिवासी नितीन मांगडे यांनी सांगितले की, “रस्त्याचा आधार कमजोर झाल्यामुळे पुढील धोका टाळण्यासाठी त्वरित उपाययोजना करणे गरजेचे आहे.”
सार्वजनिक बांधकाम विभागाचे शाखा अभियंता हेमंत मोरे यांनी सांगितले की, “घटनेची माहिती मिळाली असून लवकरच पाहणी करून आवश्यक त्या उपाययोजना करण्यात येतील.”दरम्यान, वाहतूक पोलिस विभागाकडून या ठिकाणी सुरक्षेच्या दृष्टीने तात्पुरती उपाययोजना करण्यात येणार असल्याचे सांगण्यात आले आहे.
