डेक्कन जिमखाना, शिवाजीनगर, तसेच मध्य भागातील विश्रामबाग, खडक, समर्थ, फरासखाना पोलिस ठाण्यांच्या हद्दीत पोलिसांनी गुरुवारी रात्री झाडाझडती घेतली. या कारवाईत वेगवेगळ्या भागांत तपासणी करण्यात आली.बेकायदा प्रकार करणाऱ्या ४० जणांविरोधात खटले, तसेच गुन्हे दाखल करून कारवाई करण्यात आली.
परिमंडळ एकचे पोलिस उपायुक्त कृषिकेश रावले यांच्या नेतृत्वाखाली फरासखाना, समर्थ, खडक, विश्रामबाग, डेक्कन आणि शिवाजीनगर पोलिस ठाण्यांच्या हद्दीत ही मोहीम राबविण्यात आली. मध्य भागातील ४१ संवेदनशील ठिकाणे, मोकळ्या जागा, तसेच सार्वजनिक जागांची तपासणी करण्यात आली.
सार्वजनिक मद्यपान, अमली पदार्थांचे सेवन, शांतता भंग करणे, तसेच छेडछाड करणाऱ्यांविरोधात पोलिसांकडून कारवाई करण्यात आली. गुरुवारी रात्री दोन तास ही माेहीम राबविण्यात आली. भारतीय न्याय संहिता कलम २८५ अन्वये दोन गुन्हे दाखल केले.
सार्वजनिक ठिकाणी धूम्रपान, तंबाखूजन्य पदार्थांचे सेवन करणे (कोटपा ॲक्ट) अन्वये पाच खटले दाखल करण्यात आले. महाराष्ट्र पोलिस कायद्यान्वये २२ जणांविरुद्ध कारवाई केली. वाहतूक नियमभंग केल्याप्रकरणी पोलिसांनी कारवाई केली. ट्रिपल सीट जाणाऱ्या दहा दुचाकीस्वारांविरोधात कारवाई करण्यात आली.
वाहन चालवताना मोबाइलवर संभाषण करणे, तसेच राँग साईडने जाणाऱ्या दुचाकीस्वारांविरोधात कारवाई करण्यात आली. पोलिस आयुक्त अमितेशकुमार, पोलिस उपायुक्त कृषिकेश रावले यांच्या मार्गदर्शनाखाली खडक, शिवाजीनगर, डेक्कन, विश्रामबाग, फरासखाना, समर्थ पोलिस ठाण्यातील अधिकारी आणि कर्मचाऱ्यांची पथके या कारवाईत सहभागी झाले होते.
‘पुढील काळात पोलिसांकडून अचानक कारवाई करण्यात येणार असून, संवेदनशील ठिकाणांची तपासणी करण्यात येणार आहे,’ असे पोलिस उपायुक्त रावले यांनी सांगितले.
