लग्नसोहळा म्हटलं की, लगीन घरी तयारीची धामधूम सुरू असते. खरेदीसह इतर बाबींमध्ये कुटुंबातील सदस्यांचा दिवसभराचा वेळ जात असतो. मात्र लग्न घरी आनंदाचं वातावरण असताना अक्षय्य तृतीयेच्या दिवशीच नवरदेवाचा मृत्यू झाल्याची घटना जळगाव जिल्ह्यात घडली आहे.
लग्नसोहळा आठ दिवसांवर आलेला असताना नवरदेवाचे हृदयविकाराच्या तीव्र झटक्याने निधन झाल्याने कुटुंबियांच्या आनंदावर विर्जन पडले. जळगाव जिल्ह्यातील वरणगाव येथील भोईवाडा परिसरात राहणाऱ्या रितेश रवींद्र सोनवणे (वय 30) यांचे अक्षय्य तृतीयेच्या दिवशी सकाळी साडेसात वाजता हृदयविकाराच्या झटक्याने निधन झाले. त्यामुळे सोनवणे परिवारावर दुःखाचा डोंगर कोसळला आहे.
मिळालेल्या माहितीनुसार, रितेश सोनवणे यांचा विवाह 28 एप्रिल रोजी बुलढाणा जिल्ह्यातील मलकापूर येथील देवबादा गावातील पांडुरंग बोरसे यांच्या मुलीसोबत निश्चित झाला होता. त्यामुळे आठ दिवस लग्नाला बाकी असताना रितेश सोनवणे यांची धावपळ सुरू होती. मात्र नियतीच्या मनात वेगळंच काहीतरी होतं.
सकाळी साडेसात वाजता रितेश यांचा हृदयविकाराच्या तीव्र झटक्याने निधन झाले. छातीत दुखू लागल्यानंतर ते घरात कोसळले आणि त्यानंतर कुटुंबियांनी त्यांना उपचारासाठी दवाखान्यात दाखल केले असता डॉक्टरांनी मयत घोषित केले.
रितेश सोनवणे यांचा दोन दिवसापूर्वीच वाढदिवस त्यांच्या मित्रांनी साजरा केला होता. घरात आधीच लग्नाची तयारी सुरू होती. मात्र आनंदाचे वातावरण असतानाच ही अतिशय दुर्दैवी घटना घडली.
दरम्यान, या घटनेमुळे वरणगाव शहरात हळहळ व्यक्त होत असून नागरिक सण बाजूला ठेवून कुटुंबियांच्या दुःखात सहभागी झाले. सकाळी 11 वाजता स्मशानभूमीत रितेश सोनवणे यांच्या पार्थिवावर शोकाकुल वातावरणात अंत्यसंस्कार करण्यात आले. त्यांच्या पश्चात आई-वडील, लहान भाऊ असा परिवार आहे.
