नुकत्याच झालेल्या महापालिका निवडणुकीतील २४ नवनिर्वाचित नगरसेवकांच्या विरोधात न्यायालयात याचिका प्रविष्ट करण्यात आल्या आहेत. निवडणुकीतील पराभूत उमेदवारांनी विविध आक्षेप उपस्थित करत न्यायालयात याचिका प्रविष्ट केली.
त्यांतील ३ नगरसेवकांवर अनधिकृत बांधकाम केल्याप्रकरणी याचिका प्रविष्ट केली आहे. महानगरपालिकेत १६५ नगरसेवक निवडून आले आहेत. सर्वाधिक भाजपचे ११९, राष्ट्रवादी काँग्रेसचे २७, राष्ट्रीय काँग्रेसचे १५, काँग्रेस शरद पवार गटाचे ३ आणि ठाकरे गटाचा १ असे संख्याबळ आहे.निवडणूक निकाल घोषित झाल्यानंतरच्या १० दिवसांमध्ये याचिका प्रविष्ट करता येते. त्यानुसार जिल्हा लघुवाद न्यायालयाकडून २४ नगरसेवकांच्या विरोधात नोटीस पाठवण्यात आल्याची माहिती महापालिकेच्या निवडणूक विभागाकडून देण्यात आली.
३ नगरसेवकांचे पद धोक्यात !
यापूर्वीच्या कायद्यात निवडून आलेल्या नगरसेवकाने अनधिकृत बांधकाम केल्यानंतर त्याचे पद रहित करण्याचे प्रावधान होते. सुधारित कायद्यानुसार संबंधित नगरसेवकाने निवडून येण्याआधीही अनधिकृत बांधकाम केले असेल, तरीही त्याचे पद रहित होऊ शकते. यानुसार ३ नगरसेवकांचे पद धोक्यात आले आहे.
