विमानतळ पोलिस ठाण्याच्या हद्दीत सुरू असलेल्या एका स्पावर पोलिसांनी टाकलेल्या छाप्यादरम्यान मॅनेजर आणि एका तरुणीने दुसऱ्या मजल्यावरून उडी मारून पळून जाण्याचा प्रयत्न केल्याची धक्कादायक घटना समोर आली आहे.या घटनेत दोघेही जखमी झाले असून तरुणीची प्रकृती गंभीर असल्याची माहिती पोलिसांनी दिली.
हुसेन रेहमान शेख (३९) असे जखमी मॅनेजरचे नाव असून २७ वर्षीय तरुणीवरही रुग्णालयात उपचार सुरू आहेत. दोघांना तातडीने जवळच्या रुग्णालयात दाखल करण्यात आले.
पोलिसांच्या माहितीनुसार, विमानतळ परिसरात ‘द रूट’ नावाने स्पा सुरू होता. येथे गैरप्रकार सुरू असल्याची माहिती मिळाल्यानंतर विमानतळ पोलिस ठाण्याच्या पथकाने सायंकाळी छापा टाकला. पोलिस आल्याची चाहूल लागताच मॅनेजर आणि संबंधित तरुणीने दुसऱ्या मजल्यावरील खिडकीतून उडी मारून पसार होण्याचा प्रयत्न केला.
मात्र उडी मारताना दोघेही जखमी झाले. घटनेनंतर पोलिसांनी त्यांना ताब्यात घेऊन उपचारासाठी रुग्णालयात दाखल केले. या प्रकरणाची नोंद करण्याचे काम रात्री उशिरापर्यंत सुरू होते.या घटनेबाबत अधिक तपास विमानतळ पोलिसांकडून सुरू आहे.
