मध्य रेल्वे पुण्यातील दोन महत्त्वाच्या रेल्वे गाड्यांच्या ठिकाणांमध्ये बदल करण्याचा निर्णय घेतला आहे. रेल्वेच्या पुणे विभागाकडून हुजूर साहिब नांदेड-पुणे एक्स्प्रेसच्या टर्मिनसमध्ये हा बदल करण्यात आला आहे. पुणे स्थानकावर येणारी गाडी आता हडपसर स्थानकावर स्थलांतरित केली आहे. त्यामुळे गाडी क्रमांक १७६३० हुजूर साहिब नांदेड-पुणे एक्स्प्रेस पुण्याऐवजी हडपसर स्थानकावर ०४:३५ वाजता पोहोचेल. पुणे स्टेशनला प्रवास करू इच्छिणाऱ्या प्रवाशांना गाडी क्रमांक ११४२२ सोलापूर-पुणे डेमू ट्रेनची सुविधा उपलब्ध आहे. ही ट्रेन हडपसर येथून ५.२५ वाजता पुणे स्टेशनसाठी सुटते. त्यामुळे प्रवाशांनी या सेवेचा लाभ घ्यावा, असे आवाहन रेल्वे प्रशासनाकडून करण्यात आले आहे.
पुणे रेल्वे विभागातील नांदेड-पुणे एक्स्प्रेस आणि पुणे-हरंगुळ-पुणे एक्स्प्रेस या दोन गाड्यांच्या ठिकाणात बदल केला आहे. या गाड्या २६ जानेवारीपासून हडपसर टर्मिनल येथून सुटणार असून, हडपसरपर्यंतच धावणार आहेत. त्यामुळे प्रवाशांनी या बदलाची नोंद घ्यावी, असे आवाहन रेल्वेकडून करण्यात आले आहे. काही प्रवासी संघटनाकडून रेल्वे गाड्यांच्या टर्मिनल बदलाला विरोध करण्यात येत आहे.
२६ जानेवारीपासून नांदेड-पुणे एक्स्प्रेसचा प्रवास पुणे स्टेशनऐवजी हडपसर स्थानकावर संपणार आहे. ही गाडी पहाटे साडेचार वाजता हडपसर स्थानकावर येणार आहे. त्यामुळे तेथून इच्छितस्थळी जाणाऱ्या प्रवाशांना पीएमपीचा पर्याय उपलब्ध नाही. त्यामुळे अव्वाच्या सव्वा भाडे देऊन रिक्षाने प्रवास करावा लागू शकतो. खासगी वाहनांशिवाय पर्याय नाही. त्यामुळे रेल्वे प्रशासनाने डेमूने प्रवास करावा, असे आवाहन केले आहे. मात्र, त्यासाठी एक तासभर स्थानकावर बसून राहावे लागेल, असे संघटनांनी म्हटले आहे.
