राज्याचे उपमुख्यमंत्री अजित पवार यांच्या निधनाने सर्वांनाच धक्का बसला. दादांच्या अकाली एक्झिटवर कोणाचाही विश्वास बसत नाहीये. दादांनी सत्ताधारी नेत्यांसह विरोधी पक्षातील लोकांच्या मनात वेगळं स्थान निर्माण केले होते. शब्दाचे पक्के, निडर आणि निर्भिड दादांचा विमान अपघातामध्ये मृत्यू झाला. कामाचा माणूस म्हणून आपली छाप पाडलेले दादा आता आपल्यात राहिले नाहीत. बारामती येथे विमान रनवेवर लँड करताना ही दुर्घटना घडली. राष्ट्रवादी पक्षाच्या नेत्यांसह कार्यकर्त्यांचा दादा आता राहिला नाही. मुख्यमंत्री देवेंद्र फडणवीस यांनी दादांच्या मृत्यूनंतर राज्यात तीन दिवसाचा दुखवटा जाहीर केला. दादांच्या निधनानंतर प्रत्येकजण दादांसोबतची आठवण किंवा शोक संदेश लिहित आपल्या मनातील भावनांना वाट मोकळी करून देत आहे. राज्य महिला आयोगाच्या अध्यक्ष रूपाली चाकणकर दादा नावाच्या व्यक्तीच्या सावलीत असणाऱ्या आम्हा सर्वांना काळाने पोरक केल्याचं म्हटलं आहे.
आमच्या राष्ट्रवादी परिवारावर आज दुःखाचा डोंगर कोसळला, दादा नावाच्या व्यक्तीच्या सावलीत असणाऱ्या आम्हा सर्वांना काळाने पोरक केलं. आमच्या डोक्यावरील आधाराची आणि मायेची सावलीच हिरावून घेतली. सूर्याच्या साक्षीने दादांचं काम सुरू व्हायचं, काम घेऊन येणाऱ्या प्रत्येक माणसाला दादा आपले काम करतील हा विश्वास वाटायचा हीच दादांची ओळख होती. दादा स्पष्टपणे जितके बोलायचे त्याच्या कैक पटीने जास्त त्यांच्या मनात प्रत्येकाबद्दल आदर आणि आपुलकी असायची, असं रूपाली चाकणकर यांनी म्हटलं आहे.
आम्हा सर्वांना दादांची आदरयुक्त भीती होती, संघटनेच्या कामकाजात देखील ते अतिशय स्पष्टपणे सर्व गोष्टी समजावून सांगायचे. शेवटच्या घटकांला केंद्रस्थानी ठेवून आपल्याला पक्ष संघटन मजबूत करायचे आहे. महिलांना राजकारणात जास्तीत जास्त प्रतिनिधित्व करण्याची संधी द्यायची आहे, असे सांगणारे लाडक्या बहिणींचे हक्काचे दादा होते. आजच्या घटनेनंतर खरोखर व्यक्त होण्यासारखे काहीच उरलेले नाही, आमचा सर्व राष्ट्रवादी परिवार आमचे आदर्श असलेल्या नेतृत्वाला पोरका झाल्याच म्हणत चाकणकर यांनी दादांना श्रद्धांजली वाहिली आहे.
