बीड जिल्ह्यातील केज तालुक्यातील एका गावात अल्पवयीन मुलीवर बळजबरीने अत्याचार झाल्याची धक्कादायक घटना उघडकीस आली आहे. या घटनेमुळे जिल्ह्यात एकच खळबळ उडाली असून नागरिकांमध्ये संतापाची लाट उसळली आहे.
अत्याचारानंतर संबंधित अल्पवयीन पीडितेने विषारी औषध प्राशन करून आत्महत्येचा प्रयत्न केल्याची धक्कादायक माहिती समोर आली आहे.पीडितीची प्रकृती चिंताजनकघटनेनंतर पीडितेला तात्काळ उपचारासाठी छत्रपती संभाजीनगर येथील घाटी रुग्णालयात दाखल करण्यात आले आहे.
सध्या तिची प्रकृती चिंताजनक असल्याचे डॉक्टरांनी सांगितले असून तिच्यावर अतिदक्षता विभागात उपचार सुरू आहेत. या घटनेमुळे पीडितेच्या कुटुंबावर मोठे संकट कोसळले आहे.आरोपींनी बळजबरी करत…मिळालेल्या प्राथमिक माहितीनुसार, दोन आरोपींनी अल्पवयीन मुलीवर बळजबरी करत अत्याचार केल्याचे समोर आले आहे. या अमानुष प्रकारामुळे परिसरात भीती आणि संतापाचे वातावरण निर्माण झाले आहे. घटनेनंतर पीडितेच्या आई-वडिलांनी तातडीने केज ग्रामीण पोलीस ठाण्यात धाव घेत फिर्याद दिली.
पोलिसांनी या प्रकरणाचे गांभीर्य लक्षात घेऊन त्वरित गुन्हा दाखल केला आहे. फिर्यादीच्या आधारे दोन आरोपींविरोधात गुन्हा नोंदवण्यात आला असून त्यापैकी एका आरोपीला पोलिसांनी ताब्यात घेतले आहे. दुसरा आरोपी फरार असून त्याच्या शोधासाठी विशेष पथक रवाना करण्यात आले आहे.
दरम्यान, या प्रकरणाच्या अधिक तपासासाठी बीड येथील पिंक पथकाला पाचारण करण्यात आले असून त्यांनी तपासाची सूत्रे हाती घेतली आहेत. पोलिसांकडून सर्व बाजूंनी तपास सुरू असून आरोपींना कठोर शिक्षा व्हावी, अशी मागणी नागरिकांकडून केली जात आहे.
ही घटना पुन्हा एकदा महिलांच्या सुरक्षिततेचा प्रश्न ऐरणीवर आणणारी ठरली आहे. प्रशासनाने या प्रकरणात तत्काळ आणि कठोर कारवाई करावी, अशी अपेक्षा व्यक्त केली जात आहे.
या घटनेनंतर स्थानिक नागरिकांमध्ये तीव्र संताप व्यक्त केला जात असून आरोपींवर कठोर कारवाई करण्याची मागणी जोर धरत आहे. गावात तणावपूर्ण वातावरण निर्माण झाले असून पोलिसांनी खबरदारीचा उपाय म्हणून परिसरात बंदोबस्त वाढवला आहे.
दरम्यान, पीडितेच्या कुटुंबीयांना प्रशासनाकडून मदत देण्याबाबत हालचाली सुरू असल्याची माहिती मिळत आहे. तसेच, या प्रकरणात वैद्यकीय अहवाल आणि पुराव्यांच्या आधारे तपास अधिक गतीने पुढे नेला जात आहे. आरोपींना लवकरात लवकर अटक करून न्यायालयात उभे करण्यासाठी पोलिसांकडून प्रयत्न सुरू आहेत.
