‘गोल्डन मॅन’ म्हणून ओळख असलेल्या सनी नाना वाघचौरे यांना बिश्नोई गँगकडून पाच कोटी रुपयांच्या खंडणीसाठी जीवे मारण्याची धमकी देण्यात आली आहे. रक्कम न दिल्यास “तुझा बाबा सिद्दिकी करू” अशी थेट धमकी गँगमधील शुभम लोणकर याने दिल्याच सनी वाघचौरे यांनी दिलेल्या पोलीस अर्जात म्हटलं आहे. या प्रकरणानंतर सनी वाघचौरे यांनी थेट पिंपरी- चिंचवड पोलीस आयुक्तालयात धाव घेत लेखी तक्रार दाखल केली आहे. माझ्या जीवाला गंभीर धोका असून, लवकरात लवकर कारवाई करून पोलीस संरक्षण देण्यात यावे, अशी मागणी त्यांनी अर्जात केली आहे.
सनी नाना वाघचौरे हे सामाजिक आणि विविध प्रसिद्ध कार्यक्रमांमध्ये २ ते ३ किलो सोन्याचे दागिने परिधान करून उपस्थित राहत असल्याने ते ‘गोल्डन मॅन’ म्हणून ओळखले जातात. ६ जानेवारी रोजी विधानसभा उपाध्यक्ष अण्णा बनसोडे यांच्या मार्गदर्शनाखाली, स्वर्गीय अजित पवार यांच्या उपस्थितीत त्यांनी राष्ट्रवादी काँग्रेस पक्षात प्रवेश केला होता. सोशल मीडियावर त्यांचे २५ मिलियन फॉलोअर्स आहेत.
धमकीचा संपूर्ण प्रकार काय?२५ जानेवारी रोजी सायंकाळी ७ वाजून २२ मिनिटांनी एका आंतरराष्ट्रीय मोबाईल नंबरवरून सनी वाघचौरे यांना व्हॉट्सॲप कॉल आला, मात्र त्यांनी तो उचलला नाही. त्यानंतर “शुभम लोणकर कॉल मी” असा मेसेज आला. यानंतर पुन्हा आलेला व्हॉट्सॲप कॉल उचलल्यानंतर, समोरून “मी बिश्नोई गँगमधून शुभम लोणकर बोलतोय. गुगलवर सर्च करून बघ, बिश्नोई गँग कोण आहे ते. बाकी मेसेजवर बोलेन,” असे सांगून फोन कट करण्यात आला. त्यानंतर वेगवेगळ्या नंबरवरून वारंवार व्हॉट्सॲप कॉल येऊ लागले, मात्र सुरुवातीला कोणी मस्करी करत असल्याचे समजून सनी वाघचौरे यांनी ते गांभीर्याने घेतले नाही. मात्र २६ जानेवारी रोजी सकाळी ७ वाजून २१ मिनिटांनी आंतरराष्ट्रीय नंबरवरून व्हॉट्सॲपवर थेट धमकीचा मेसेज आल्याने ते घाबरून गेले. खंडणीसाठी पाच दिवसांची मुदत देण्यात आली असून, रक्कम न दिल्यास बाबा सिद्दिकीसारखी हत्या करण्याचा इशारा देण्यात आल्याचे त्यांनी तक्रारीत नमूद केले आहे. या संपूर्ण प्रकरणामुळे शहरात खळबळ उडाली असून, पोलिसांनी तक्रारीच्या आधारे तपास सुरू केला आहे.
