भोर तालुक्यातील नसरापूर ते बनेश्वर मंदिर रस्त्याच्या कामाची दुरुस्ती अनेक दिवसांपासून सुरू होते. मात्र, आता या रस्त्याचे सिमेंट काँक्रिटीकरणाचे काम सुरू झाले आहे. या कामामुळे मंगळवार पासून (ता.२४) २० दिवस हा रस्ता वाहतुकीस बंद करण्यात आला आहे.
बनेश्वर रस्त्याचे काम गेले अनेक दिवस सुरू असून रुंदीकरण करून मजबुतीकरण करण्यात येत आहे तसेच बाजूच्या जुन्या संरक्षक भिंत पाडून नव्याने बांधण्यात येत आहेत. रस्त्याच्या चाललेल्या या कामाच्या एकाबाजूने वातूक सोडली जात होती; मात्र मंगळवार पासून काँक्रिटीकरण सुरू झाल्याने वाहतुकीसाठी पूर्ण रस्ता बंद ठेवण्यात येणार आहे.
या दरम्यान बनेश्वर मंदिराकडे जाण्यासाठी वाहनधारकांना जानकीराम मंगलकार्याला जवळ वाहन थांबवून चालत जावे लागणार आहे.तसेच बनेश्वर मार्गे केळवडे गावाकडे जाणाऱ्या वाहनांना नसरापूर-चेलाडी माहामार्गावरून केळवडे गावाकडे जावे लागणार आहे. मंदिराकडून गावामध्ये येण्यासाठी देखील वाहनांचा वापर करता येणार नाही याची दक्षता घेऊन भाविकांनी तसेच परिसरातील नागरिकांनी सहकार्य करण्याचे आवाहन ग्रामपंचायतीच्या वतीने केले आहे.’
‘कामाचा दर्जा उत्कृष्ट ठेवा’
बनेश्वर रस्त्याचे काम सुरू झाल्यापासून ग्रामस्थ तसेच ग्रामपंचायत सदस्यांनी अनेकवेळा अक्षेप घेत काम अंदाजपत्रकाप्रमाणे व्हावे अशी मागणी केली होती यावेळी पीएमआरडीएच्या वरिष्ठ अधिकाऱ्यांना कामास भेट देऊन ठेकेदाराला योग्य त्या सूचना दिल्या आहेत. आता होत असलेल्या सिमेंट काँक्रिटीकरणाच्या कामाचा दर्जा देखील चांगला ठेवावा, अशी मागणी सरपंच उषा कदम, माजी उपसरपंच नामदेव चव्हाण, संदीप कदम यांनी केली.
