येथील मुळा नदीपात्रात वाकड स्मशानभूमीजवळ अनधिकृतपणे वाळू उपसा सुरू असल्याचे निदर्शनास आले आहे. यामुळे पर्यावरणाचा ऱ्हास होत असल्याने संबंधितांवर कारवाई करण्याची मागणी परिसरातील नागरिक करीत आहेत.दरम्यान, नदीपात्रात रात्रीच्या वेळी खड्डे खोदून वाळू उपसण्याचे काम सुरू आहे. त्यामुळे वाळू नेमके कोण काढत आहे, हे समजू शकलेले नाही.
बाणेर- बालेवाडी परिसरात नदी सुधार प्रकल्पाचे काम सुरू आहे. या कामामुळे नदीपात्र अरुंद होऊन येथील जीवसृष्टी नष्ट होणार असल्याने परिसरातील नागरिकांनी आंदोलन केले होते. परंतु तरीही हे काम अजूनही सुरू आहे. त्यात आता वाळू उपशाचा प्रकार सुरू असल्याने नागरिकांनी नाराजी व्यक्त करत, वाळू उपसा करणाऱ्यांवर कारवाई करण्याची मागणी केली आहे.
महसूल विभागातील एका अधिकाऱ्याच्या माहितीनुसार, आम्ही नदीपात्रामध्ये जाऊन प्रत्यक्ष पाहणी केली आहे. या ठिकाणी नदीपात्रात खड्डे खोदून वाळू उपसा केल्याच्या दिसत आहे. काही ठिकाणी चाळलेली वाळू त्याच जागेवर आहे. या परिसरातील नागरिकांना याबद्दल विचारणा केली असता कोणीही काही माहिती द्यायला तयार नाही. तरी या ठिकाणी तपास करून संबंधितांवर कारवाई करण्यात येईल.
