सुनेने माहेराहून पैसे आणावेत यासाठी तिचा हात गरम तव्यावर ठेवणे, पिस्तूल लावून धमकी देणे, गर्भपात करण्यासह विविध पद्धतीने शारीरिक आणि मानसिक छळ केल्याप्रकरणी पती, सासू, सासरा आणि नणंदेविरोधात लोहगाव पोलीस ठाण्यात गुन्हा नोंद करण्यात आला होता.या प्रकरणी आरोपींच्या वतिने अटकपुर्व जामिनासाठी सत्र न्यायालयात अर्ज करण्यात आले होते.
सत्र न्यायालयाने नणंदेचा अर्ज मंजूर करत इतर आरोपींचे अटकपुर्व जामिनाचे अर्ज फेटाळले होते. त्यानंतर आरोपींनी अनुक्रमे उच्च न्यायालय आणि सर्वोच्च न्यायालयात धाव घेतली. मात्र दोन्ही न्यायालयाने सत्र न्यायालयाचा निकाल कायम ठेवत अटकपूर्व जामीन फेटाळले.
त्यानुसार सोमवारी (ता.२३) आरोपी स्वतःहून लोहगाव पोलीस ठाण्यात हजर झाले. संशयित आरोपींना न्यायालयात हजर केले असता न्यायालयाने त्यांना चार दिवसांची पोलीस कोठडी सुनावली.
याप्रकरणी पती आदित्य अनिल लोखंडे (वय २८), सासरे अनिल किसन लोखंडे (वय ५३), सासू सुवर्णा (वय ४८, सर्वजण, रा. मरकळ, ता. खेड) अशी अटकेत असलेल्या संशयित आरोपींची नावे आहेत. याबाबत २६ वर्षीय विवाहितेने फिर्याद दिली होती.
लग्नात दोन कोटी २९ लाख रुपये खर्च, ५५ तोळे सोने, दोन किलो चांदी आणि फॉर्च्यूनर गाडी दिल्यानंतरही पतीचे दोन कोटी रुपयांचे कर्ज फेडण्यासाठी विवाहितेचा छळ करण्यात येत असल्याचे फिर्यादीत नमूद आहे. याबाबत लोहगाव पोलीस अधिक तपास करीत आहेत.
या प्रकरणी तपासाचे काम सुरु असून गुरुवारी (ता.२६) आरोपींची पोलीस कोठडीतील मुदत संपत आहे. त्यामुळे पुढील तपासाकरिता त्यांना न्यायालयात हजर करुन पोलीस कोठडीत वाढ करण्याची मागणी करणार आहे.
