पुण्यात चंद्रग्रहणाच्या निमित्ताने अंधश्रद्धेविरोधात एक हटके उपक्रम राबवण्यात आला. महाराष्ट्र अंधश्रद्धा निर्मूलन समितीच्या वतीने ‘सोडा अंधश्रद्धेचं ग्रहण’ हा कार्यक्रम घेण्यात आला.ग्रहण लागलं की अजूनही अनेक ठिकाणी गर्भवती महिलांना भाजी चिरू नको, कात्री लावू नको, काही खाऊ नको असं सांगितलं जातं. “ग्रहणात भाजी चिरली तर बाळाचे ओठ फाटतात”, अशी समजूत आजही काही घरांमध्ये पाळली जाते.
पण पुण्यातील नांदेड सिटी, सिंहगड रोड परिसरात राहणाऱ्या चांदणी प्रफुल्ल थोरात यांनी ही समजूत फेटाळली. ग्रहण सुरू होताच त्यांनी स्वयंपाकघरात जाऊन भाज्या चिरल्या, कात्रीने कागद कापले आणि अगदी निर्धास्तपणे जेवणही केलं.
यावेळी बोलताना त्यांनी सांगितले की, “माझ्या बाळावर अंधश्रद्धेचे नाही तर वैज्ञानिक विचारांचे संस्कार व्हावेत म्हणून मी हे केलं.” दरम्यान, स्त्रीरोग तज्ज्ञ डॉ. संजय निटवे यांनीही स्पष्ट केलं की बाळाचे ओठ फाटणे हे जनुकीय कारणांमुळे किंवा आईच्या पोषणाच्या कमतरतेमुळे होतं. त्याचा ग्रहणाशी काहीही संबंध नाही.
अंधश्रद्धेपेक्षा विज्ञानावर विश्वास ठेवा, असा संदेश या उपक्रमातून देण्यात आला आहे.अंधश्रद्धा निर्मूलन समितीची प्रतिक्रियी”ग्रहण ही एक खगोलीय घटना आहे. आज भारतामध्ये चंद्रग्रहण सुरु आहे. चंद्रग्रहणाबद्दल बऱ्याच अंधश्रद्धा आपल्या देशामध्ये आहे. राहू आणि केतू या नावाचे दोन राक्षस चंद्राला गिळायला येतात, अशी एक मोठ समजूत आहे.
ग्रहण काळात आपल्या घरातील अन्न, पाणी दुषित होतं. त्यामुळे ते बाहेर टाकून दिलं जातं. तसेच गरोदर महिलांना ग्रहण काळात भाजी चिरु दिली जात नाही. ग्रहण काळात भाजी चिरली तर बाळाचे ओठ फाटतात अशी अंधश्रद्धा आहे. ही अंधश्रद्धा दूर करण्यासाठी आज महाराष्ट्र निर्मूलन अंधश्रद्धा समितीने सोडा अंधश्रद्धेचे ग्रहण हा उपक्रम राबवला.
या उपक्रमामध्ये चांदणी प्रफुल्ल थोरात या गरोदर महिलेने भाजी चिरली आणि दाखवून दिलं की ग्रहणामध्ये गरोदर महिलांनी अंधश्रद्धा पाळू नये”, अशी प्रतिक्रिया अंधश्रद्धा निर्मूलन समितीच्या पदाधिकाऱ्यांनी दिली.
