मद्य सेवन करून वाहन चालविणाऱ्या चालकांविरुद्ध शहर वाहतूक शाखेने विशेष मोहीम राबवत तीन दिवसांत ३०१ वाहनचालकांवर कारवाई केली. अपघातांना आळा घालण्यासाठी आणि रस्ते सुरक्षिततेसाठी ही मोहीम हाती घेण्यात आली आहे.
वाहतूक शाखेचे पोलिस उपायुक्त हिंमत जाधव यांनी दिलेल्या माहितीनुसार, २७ फेब्रुवारी ते एक मार्च या कालावधीत शहरातील विविध भागांत ३० नाकाबंदी पॉइंट उभारण्यात आले होते. ब्रेथ अ‍ॅनालायझरच्या साहाय्याने वाहनचालकांची तपासणी करण्यात आली.
यावेळी मद्य सेवन करून वाहन चालविताना आढळलेल्या ३०१ जणांवर मोटार वाहन कायद्यानुसार दंडात्मक कारवाई करण्यात आली.यापूर्वी २५ फेब्रुवारी रोजी शहरातील ३० ठिकाणी ‘सरप्राईज ड्रंक अ‍ॅण्ड ड्राईव्ह’ कारवाई करण्यात आली.
अचानक लावलेल्या नाकाबंदीत ३१ मद्यपी वाहनचालक आढळून आले. अपघात प्रतिबंध, रस्ते सुरक्षितता वाढविणे, नागरिकांच्या जीवित आणि मालमत्तेचे संरक्षण करणे हा या मोहिमेचा उद्देश असल्याचे वाहतूक शाखेकडून सांगण्यात आले.
