येरडव-मुंबई दिवसा धावणारी गाडी पूर्ववत सुरू करणे, पाचल-डोंबिवली-कल्याण आणि पुणे-अक्कलकोट या मार्गावर एसटी सेवा सुरू झाल्या आहेत. ऐन शिमगोत्सवामध्ये सुरू झालेल्या गाड्यांमुळे या मार्गावरून प्रवास करणाऱ्या प्रवाशांचा प्रवास अधिक सुखरूप झाला आहे.
राजापूर तालुक्यातील येरडव-मुंबई या मार्गावर दिवसा धावणारी एकमेव एसटी बंद असल्यामुळे स्थानिक प्रवाशांची मोठ्या प्रमाणावर गैरसोय होत होती. कामानिमित्त, शैक्षणिक तसेच वैद्यकीय कारणांसाठी दररोज मुंबईकडे प्रवास करणाऱ्या नागरिकांना पर्यायी व्यवस्था उपलब्ध नसल्याने त्यांना अडचणींना सामोर जावे लागत होते.
सध्या शिमगोत्सव (होळी उत्सव) सुरू असल्याने गावाकडे ये-जा करणाऱ्या प्रवाशांची संख्या लक्षणीयरीत्या वाढली आहे. त्यामुळे येरडव-मुंबई ही दिवसा धावणारी गाडी तत्काळ पूर्ववत सुरू करावी, अशी मागणी आमदार सदाभाऊ खोत यांनी परिवहन मंत्री प्रताप सरनाईक यांच्याकडे निवेदनाद्वारे केली.
ही मागणी पाचल व्यापारी संघटनेकडून करण्यात आली होती. पाचल येथून कल्याणकडे जाणारी थेट एसटी नसल्याने प्रवाशांना मोठ्या अडचणींना सामोरे जावे लागत होते.त्यामुळे राजापुर आगारामार्फत पाचल डोंबिवली-कल्याण अशी नवीन एसटी सेवा सुरू करावी अशी मागणी करण्यात आली. पुणे-अक्कलकोट या मार्गावरही एस.टी. सेवा सुरू करण्याबाबत निवेदन देण्यात आले होते.
