पुणेकरांसाठी एक दिलासादायक बातमी समोर येत आहे. लोहगाव एअरपोर्टवर जाण्यासाठी आता ट्राफिक जामचा सामना करावा लागणार नाही. यासाठी एक मोठा निर्णय घेण्यात आला आहे. वनाज ते रामवाडी दरम्यान सुरू असलेल्या मेट्रो लाईनचा विस्तार करुन ती आता थेट विमानतळापर्यंत नेण्यास मंजुरी मिळाली आहे.
हा नवीन मार्ग कल्याणी नगरमार्गे जाणार आहे. केंद्रीय नागरी विमान वाहतूक राज्यमंत्री मुरलीधर मोहोळ यांच्या उपस्थितीत झालेल्या बैठकीत हा निर्णय घेण्यात आला. या बैठकीत महामेट्रोने सहा वेगवेगळे पर्याय सादर केले होते. या पर्यायांपैकी ‘कल्याणी नगर स्पर लाईन’ला मंजुरी देण्यात आली. अधिकाऱ्यांच्या मते, हा मार्ग तांत्रिकदृष्ट्या सोपा आणि व्यवहार्य मानला गेला आहे.
Qसिम्बॉयसिस कॉलेजमार्गे विमानतळापर्यंतही नवीन लाईन कल्याणी नगर स्थानकापासून पुढे जाईल. तिथून सिम्बॉयसिस कॉलेजच्या मार्गे थेट विमानतळाजवळ बनवण्यात आलेल्या ‘एरोमॉल’पर्यंत जाईल. याचा अर्थ असा की, प्रवाशांना आता रामवाडी किंवा आसपासच्या परिसरातून रिक्षा किंवा टॅक्सी घेण्याची गरज भासणार नाही. मेट्रो त्यांना थेट विमानतळाच्या प्रवेशद्वारापर्यंत नेऊन सोडेल.
संरक्षण विभागाच्या जमिनीचा अडथळा दूरअधिकाऱ्यांनी दिलेल्या माहितीनुसार, या लाईनसाठी खूप कमी जमीन संपादित करावी लागेल. मेट्रोचा ट्रॅक प्रामुख्याने रस्त्याच्या वरुन जाणार आहे. यामुळे संरक्षण मंत्रालयाच्या जमिनीशी संबंधित अडचणी येणार नाहीत आणि मंजुरीची प्रक्रिया सोपी होईल. यापूर्वी ज्या पर्यायांचा विचार करण्यात आला होता, त्यामध्ये संरक्षण विभागाची जमीन हा मोठा अडथळा ठरत होता.
महामेट्रो आता या विस्तारित लाईनचा सविस्तर प्रकल्प अहवाल (DPR) तयार करून पुणे महानगरपालिकेला सादर करेल. यासोबतच वनाज ते चांदणी चौक आणि रामवाडी ते वाघोली या प्रस्तावित विस्तारालाही पुढे नेण्याची तयारी सुरू आहे. शहराचा वेगाने विस्तारणारा परीघ लक्षात घेता शेवाळेवाडी, कात्रज आणि वाकड फाटा यांच्या समांतर एका नवीन मेट्रो मार्गाच्या योजनेवरही काम सुरू आहे. विमानतळापर्यंत थेट मेट्रो कनेक्टिव्हिटी ही शहराची दीर्घकाळापासूनची मागणी होती. मंजुरी मिळाल्यानंतर आता पुढील प्रक्रियेकडे सर्वांचे लक्ष लागले आहे.
