नांदेड सिटी परिसरात २१ वर्षीय तरुणाने पिस्तुलातून डोक्यात गोळी झाडून जीवन संपविल्याची धक्कादायक घटना समोर आली आहे. या घटनेमुळे परिसरात खळबळ उडाली असून, पोलिसांनी घटनास्थळावरून देशी बनावटीचे पिस्तूल जप्त करत तपास सुरू केला आहे.
पार्थ बापू गोरे (वय-२१, रा. आसावरी इमारत, नांदेड सिटी) असे आत्महत्या केलेल्या तरुणाचे नाव आहे. याबाबत पोलिस उपनिरीक्षक गणेश कसबे यांनी नांदेड सिटी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, पार्थ गोरे हा नांदेड सिटीत त्याच्या मामाकडे वास्तव्यास होता.मंगळवारी (ता. १०) आसावरी इमारतीतील एका सदनिकेत तरुणाने गोळी झाडून आत्महत्या केल्याची माहिती पोलिसांना मिळाली. तपासादरम्यान पार्थने पिस्तुलातून डोक्यात गोळी झाडल्याचे प्राथमिक चौकशीत समोर आले.
जखमी अवस्थेत त्याला तातडीने रुग्णालयात दाखल करण्यात आले; मात्र त्याचा मृत्यू झाल्याचे डॉक्टरांनी घोषित केले.पोलिसांनी घटनास्थळाचा पंचनामा करून देशी बनावटीचे पिस्तूल जप्त केले आहे.
या प्रकरणी अकस्मात मृत्यूची नोंद करण्यात आली असून, पार्थने आत्महत्या का केली याचा तपास सुरू आहे. तसेच, त्याच्याकडे आलेले पिस्तूल कोणाकडून मिळाले, याचाही शोध पोलिस घेत आहेत.
