पुणे :पुणे महानगरपालिकेच्या अतिक्रमण/अनाधिकृत बांधकाम निर्मूलन विभागाकडून नगर रोड परिसरात मोठी कारवाई करण्यात आली. मंगळवार, दि. १७ मार्च २०२६ रोजी सकाळी ६ वाजता लोहगाव व खराडी परिसरातील अनधिकृत बांधकामांवर धडक मोहीम राबवण्यात आली.
महापालिका आयुक्तांच्या आदेशानुसार ही कारवाई उप आयुक्त सोमनाथ बनकर, मुख्य सुरक्षा अधिकारी तथा सहाय्यक विभाग प्रमुख डॉ. रमेश शेलार आणि महापालिका सहाय्यक आयुक्त प्रकाश वालगुडे यांच्या नियंत्रणाखाली पार पडली. या मोहिमेत बांधकाम विकास विभागाचे कनिष्ठ अभियंता सौरभ खरात उपस्थित होते.
कारवाईदरम्यान एकूण सुमारे १०,००० चौरस फूट क्षेत्रातील कच्चे व पक्के शेड तसेच अनधिकृत बांधकामे निष्कासित करण्यात आली. सकाळी लवकर सुरू झालेल्या या कारवाईमुळे परिसरात मोठी खळबळ उडाली.
या मोहिमेसाठी महापालिकेचे २० पोलीस कर्मचारी, एमएसएफचे ५० जवान, ६ जेसीबी, २ गॅस कटर, ४ ब्रेकर तसेच ६ सहाय्यक अतिक्रमण निरीक्षक आणि २० बिगारी सेवक यांचा मोठा फौजफाटा तैनात करण्यात आला होता.
महापालिकेकडून शहरातील अनधिकृत बांधकामांविरोधात पुढील काळातही अशाच धडक कारवाया सुरू राहणार असल्याचे संकेत देण्यात आले असून, नियमबाह्य बांधकाम करणाऱ्यांवर कठोर कारवाई करण्यात येणार असल्याचा इशारा प्रशासनाने दिला आहे.
