महापालिकेच्या महत्त्वाकांक्षी मुळा-मुठा नदीकाठ सुधार प्रकल्पाच्या संगमवाडी ते बंडगार्डन या नवव्या टप्प्यातील बहुतांश काम मार्गी लागले आहे. संगमवाडी येथील नदीवरील पुलापासून बंडगार्डन येथील गणेश घाटापर्यंत काम करण्यात आले आहे. यातील पथदर्शी दीड किलोमीटर अंतराचा टप्पा सोमवारी, प्रजासत्ताकदिनीच नागरिकांसाठी खुला केला जाणार आहे. 31 मार्च 2026 अखेरपर्यंत 3.7 किलोमीटर अंतराचा संपूर्ण नववा टप्पा खुला करण्याचे पालिकेचे उद्दिष्ट आहे.
महापालिकेचे शहर अभियंता प्रशांत वाघमारे यांनी शनिवारी संगमवाडी येथील नदीकाठसुधार प्रकल्पाच्या कामाची पाहणी केली. नदीकाठसुधार प्रकल्पाचे कार्यकारी अभियंता बिपीन शिंदे यांच्यासह पालिकेचे अधिकारी, कंत्राटदारांचे प्रतिनिधी आदी या वेळी उपस्थित होते.
या प्रकल्पाचे सहा मार्च 2022 रोजी पंतप्रधान नरेंद्र मोदी यांच्या हस्ते भूमिपूजन झाले होते. हा प्रकल्प मुळा, मुठा आणि दोन्ही नद्या एकत्र आल्यानंतरचा परिसर असे मिळून दोन्ही बाजूस 44 किलोमीटरचा काठ विकसित केला जाणार आहे. यापैकी तीन टप्प्यांमध्ये मिळून 17.8 किलोमीटर अंतराचे काम सध्या सुरू आहे. पहिल्या टप्प्यात (प्रकल्पाचा नववा टप्पा) संगमवाडी ते बंडगार्डन येथील गणेश घाटापर्यंतचे सुमारे 3.7 किलोमीटर अंतराचे काम महापालिकेने सुरू केले होते. या कामासाठी संगमवाडी येथील स्मशानभूमीजवळील नदीकाठालगतची संरक्षण विभागाची जागा ताब्यात घेण्यासाठी पालिकेला बरेच प्रयत्न करावे लागले. काही दिवसांपूर्वीच पालिकेला या जागेचा ताबा मिळाल्याने येथील कामाला गती आली आहे.
दीड किलोमीटरचे काम आता पूर्ण करण्यात आले आहे. या भागात फिरण्यासाठी आलेल्या नागरिकांना जॉगिंग ट्रॅक; तसेच विविध ठिकाणी नागरिकांना बसण्यासाठी पायऱ्या तयार करण्यात आल्या आहेत. याच पद्धतीने संगमवाडी येथे असलेल्या ‘सीओईपी’च्या बोट क्लबच्या विरुद्ध बाजूस पाटील इस्टेट वसाहतीच्या जवळही सुविधा उपलब्ध करून देण्यात आल्या आहेत.
मुळा-मुठा संगमाच्या परिसरात उतरत्या पायऱ्यांची रचना करण्यात आली आहे. या पायऱ्यांसाठी उष्णतेने गरम न होणाऱ्या खास दगडाचा वापर केला गेला आहे. याशिवाय येथे देशी वृक्षांची लागवडही करण्यात आली असून, विद्युत रोषणाईही करण्यात आली आहे. या पायऱ्यांवर एका वेळी दोन हजार नागरिक बसू शकतील, असा दावा पालिकेने केला आहे. मुख्य संगमवाडी रस्त्यावर गतिरोधक बसवल्यास वाहनांचा वेग कमी होईल आणि नागरिकांना सुरक्षितपणे रस्ता ओलांडता येईल, याकडे या नागरिकांनी लक्ष वेधले.
