ऑनलाइन गेमिंग बऱ्याचदा खेळणाऱ्याचे आयुष्य उद्ध्वस्त करून टाकत असते. अशीच एक घटना कोल्हापुरात उघडकीस आली आहे. हातकणंगले तालुक्यातील कोरोची येथील 24 वर्षीय आदित्य मिलिंद कोळी याने ऑनलाईन गेमिंगचा नाद लागल्यानंतर अडचणीत सापडल्याने थेट आत्महत्याचा निर्णय घेतला आहे.
गेमिंगच्या माध्यमातून पैसे हरल्याने उद्भवलेल्या आर्थिक नुकसानीतून तो नैराश्यात आला होता. त्यामुळेच त्याने गळफास घेऊन आत्महत्या केल्याची धक्कादायक घटना शनिवारी सायंकाळच्या सुमारास घडली. घटनास्थळी पोलिसांना सुसाईड नोट मिळाली असून, त्यात त्याने आपण गेमिंगच्या व्यसनामुळे मोठ्या प्रमाणात पैसे गमावल्याने नैराश्यग्रस्त झाल्याचे स्पष्टपणे नमूद केले होते.
शनिवारी सायंकाळी घरातील बाकी सदस्य कामात असताना आदित्यने वरच्या मजल्यावरील खोलीतील लोखंडी अँगलला दोरी बांधून गळफास घेतला. कुटुंबीयांच्या लक्षात येताच त्याला तात्काळ खाली उतरविण्यात आले; मात्र तोपर्यंत त्याचा मृत्यू झाला होता. घटनेची माहिती त्याचा चुलत भाऊ भालचंद्र कोळी याने शहापूर पोलीस ठाण्यात दिली.
वडिलांच्या निधनानंतर जबाबदारी अन् गेमिंगच्या आहारीहातकणंगले तालुक्यातील आदित्यच्या वडिलांचे वर्षभरापूर्वी निधन झाल्यानंतर घरात आई, लहान बहीण आणि आदित्य असे तिघेजण राहत होते. कुटुंबाची जबाबदारी खांद्यावर असतानाच तो ऑनलाईन गेमिंगच्या जाळ्यात अडकला.
गेमिंगमध्ये लावलेले पाच हजारांपासूनचे पैसे लाखोंच्या घरात गेल्याने त्याच्यावर आर्थिक बोजा वाढत गेला.लाखोंचा फटका आणि अंतिम पाऊलसुरुवातीला दहा हजार रुपये गेमिंगमध्ये गुंतवल्यानंतर त्याने नंतर मित्रांकडून घेतलेले पैसे देखील हरले. आर्थिक कोंडीतून बाहेर पडण्यासाठी त्याने स्वतःचा 35 हजार रुपये किमतीचा मोबाईल विकून ती रक्कम गेमिंगमध्ये ओतली. त्यानंतर इतर ठिकाणांहून घेऊन 80 हजार रुपये देखील त्याने गेमिंगमध्ये गमावले, ज्यामुळे तो कर्जबाजारीपणात सापडला.
सुसाईड नोटमध्ये त्याने गेमिंगमध्ये पैसे हरल्याने उद्भवलेल्या नैराश्यातून आपण आत्महत्या करत असल्याचे सांगितले असून, याला कोणास जबाबदार धरू नये अशी विनंतीही केली आहे.पालक-समाजामध्ये चिंतेचं वातावरणआदित्य मनमिळाऊ स्वभावाचा असल्याने परिसरात त्याचा मोठा मित्रपरिवार होता. त्याच्या अशा अचानक निधनाने परिसरात आणि विशेषतः पालक-तरुणांच्या मनात ऑनलाईन गेमिंगच्या धोक्यांबाबत चिंता व्यक्त करण्यात आली आहे.
तज्ज्ञ आणि मानसशास्त्रज्ञांच्या भाषेत गेमिंगच्या व्यसनातून अशा प्रकारचे आर्थिक-मानसिक संकट वाढत असल्याने तरुणांना वेळीच मानसिक आरोग्य सेवा, पालकांचे मार्गदर्शन आणि इंटरनेट-मोबाईल वापरात नियंत्रण आवश्यक आहे, असे तज्ज्ञांकडून म्हटले जात आहे.
