जमीन खरेदी करून मोठा नफा मिळवून देण्याच्या आमिषाने एका निवृत्त सहायक पोलीस आयुक्ताने व्यावसायिकाची तब्बल २ कोटी ४० लाख रुपयांची फसवणूक केल्याचा गंभीर प्रकार समोर आला आहे. आरोपींनी खोटे बँक खाते उघडून आणि बनावट कंपनीच्या नावाने व्यवहार करून ही रक्कम उकळल्याचे उघड झाले आहे.
या प्रकरणी चतु:शृंगी पोलीस ठाण्यात निवृत्त सहायक पोलीस आयुक्त सुशील शंकरराव कदम, त्यांची पत्नी नंदा कदम, मुलगा अनिकेत कदम ( तिघेही रा. तळवलकर जिमसमोर, फर्ग्युसन रस्ता, पुणे ) दत्ता केदारी ( रा. बोरज, जि. पुणे ) आणि बाळासाहेब आर. वाळुंज ( रा. कामशेत, ता. मावळ ) या पाच जणांविरुद्ध गुन्हा दाखल करण्यात आला आहे. तक्रारदार अभिजित विलास उंद्रे ( वय ३५, रा. मांजरी खुर्द, पुणे ) हे व्यावसायिक आहेत.
पोलिसांनी दिलेल्या माहितीनुसार, सुशील कदम हे पुणे पोलीस दलातून सहायक पोलिस आयुक्त पदावरून निवृत्त झाले आहेत. डिसेंबर २०१६ ते २१ मे २०२५ या कालावधीत आरोपींनी तक्रारदार उंद्रे यांना मुंबईतील बालकिशन गुप्ता यांच्या मालकीची खेड तालुक्यातील बोरज येथील १२ एकर मोक्याची जमीन विक्रीसाठी उपलब्ध असल्याचे सांगितले.
या जमिनीत गुंतवणूक केल्यास प्रचंड नफा होईल, असे आमिष दाखवले.उद्रे यांच्याकडून रक्कम स्वीकारण्यासाठी आरोपींनी बालकिशन गुप्ता यांच्या नावाने खोटे बँक खाते उघडले आणि तक्रारदाराकडून ५० लाख रुपयांची पे-ऑर्डर घेतली. तसेच सोलापूर येथील एका बँकेत ‘ॲरिस्टोन मल्टीकेअर प्रा. लि.’ या बनावट कंपनीच्या नावाने खाते उघडून २५ लाख रुपये आरटीजीएसद्वारे जमा करण्यास भाग पाडले.
त्यानंतर विविध कारणे सांगत आणखी ३० लाख रुपये घेतले. खरेदीखत तयार करण्यासाठी १ कोटी ३५ लाख रुपये रोख स्वरूपात स्वीकारण्यात आले.नंतर आरोपींनी जमीनमालक बालकिशन गुप्ता जिवंत असतानाही ते मृत्यू पावल्याचे खोटे सांगून व्यवहार पुढे ढकलला. जेव्हा तक्रारदाराने पैसे परत मागितले, तेव्हा आरोपींनी टाळाटाळ केली. पैसे मागण्यासाठी वारंवार गेल्यास गायब करण्याची धमकी दिल्याचेही तक्रारीत नमूद आहे. या प्रकरणाचा पुढील तपास पोलीस उपनिरीक्षक जाधव करत आहेत.
