पुण्यातील राजकीय वातावरण चांगल्याच संघर्षाने तापले. काँग्रेस प्रदेशाध्यक्ष हर्षवर्धन सपकाळ यांनी छत्रपती शिवाजी महाराज आणि टिपू सुलतान यांच्या संदर्भात केलेल्या एका वक्तव्याचा वाद विकोपाला गेला.रविवारी (15 फेब्रुवारी) पुण्यातील काँग्रेस भवनाबाहेर भाजप आणि काँग्रेस कार्यकर्ते एकमेकांशी भिडले.
या आंदोलनादरम्यान झालेल्या जोरदार दगडफेकीत एक महिला पोलीस कर्मचारी आणि काँग्रेस कार्यकर्ता जखमी झाल्याने खळबळ उडाली आहे.
नेमका वाद काय?
काँग्रेस प्रदेशाध्यक्ष हर्षवर्धन सपकाळ यांनी टिपू सुलतान आणि छत्रपती शिवाजी महाराज यांच्याबद्दल केलेल्या एका वक्तव्यामुळे भाजप आणि हिंदुत्ववादी संघटना आक्रमक झाल्या आहेत. भाजपने आरोप केला आहे की, सपकाळ यांनी महाराजांची तुलना टिपू सुलतानशी करून अपमान केला आहे. दुसरीकडे, काँग्रेसने हे आरोप फेटाळून लावले आहेत. सपकाळ यांच्या म्हणण्याचा विपर्यास केला जात असून, “इंग्रजांविरुद्ध लढताना टिपू सुलतानने महाराजांचा आदर्श डोळ्यासमोर ठेवला होता,” असे ऐतिहासिक संदर्भ त्यांनी दिल्याचे काँग्रेसचे म्हणणे आहे.
घोषणाबाजी आणि दगडफेक
रविवारी (15 फेब्रुवारी) सकाळी भाजप कार्यकर्त्यांनी मोठ्या संख्येने पुणे काँग्रेस भवनावर मोर्चा काढला. यावेळी कार्यकर्त्यांनी हर्षवर्धन सपकाळ यांचा निषेध दर्शवणारे फोटो झळकावत जोरदार घोषणाबाजी केली. भाजप आक्रमक झालेली पाहून काँग्रेस कार्यकर्तेही मोठ्या संख्येने बाहेर आले आणि ‘जशास तसे’ उत्तर देण्याचा पवित्रा घेतला.
दोन्ही बाजूंकडून घोषणाबाजी सुरू असतानाच अचानक दगडफेक सुरू झाली. या गोंधळात पोलिसांचा मोठा बंदोबस्त असतानाही परिस्थिती हाताबाहेर गेली. दगडफेकीत एका महिला पोलीस कर्मचाऱ्याला गंभीर दुखापत झाली असून काही कार्यकर्तेही रक्तबंबाळ झाले आहेत.
पोलिसांचा कडेकोट बंदोबस्त
यानंतर पोलिसांनी अतिरिक्त कुमक मागवून कार्यकर्त्यांना पांगवण्याचा प्रयत्न केला. या आंदोलनामुळे शिवाजीनगर आणि महापालिका परिसरातील वाहतूक काही काळ पूर्णपणे विस्कळीत झाली होती. सध्या परिसरात तणावपूर्ण शांतता असून पोलिसांनी दोन्ही बाजूंच्या प्रमुख कार्यकर्त्यांना ताब्यात घेतले आहे. भाजप आता सपकाळ यांच्याविरोधात गुन्हा दाखल करण्याच्या मागणीवर ठाम आहे, तर काँग्रेसने भाजपवर गुंडगिरीचा आरोप केला आहे. तसेच भाजपने पोलीस संरक्षणात दगडफेक केल्याचा आरोप कांग्रेसकडून करण्यात येत आहे.
