पिंपरी-चिंचवड शहरातील येलवाडी परिसरात दोन मित्रांमधील वादात मध्यस्थी करणाऱ्या तिसऱ्या मित्राचा हकनाक बळी गेल्याची धक्कादायक घटना घडली आहे. पत्नीवरून सुरू झालेल्या शिवीगाळीच्या वादातून ही हत्या झाल्याने परिसरात खळबळ उडाली आहे.
ऋषिकेश पवार आणि अमोल वाघ यांच्यात गेल्या काही महिन्यांपासून किरकोळ कारणावरून वाद सुरू होता. या वादात दोघांकडून एकमेकांच्या पत्नीवर अश्लील शिवीगाळ करण्यात आली होती. हा वाद मिटवण्यासाठी ऋषिकेश पवार हा आपला मित्र योगेश धाकतोंडे याला सोबत घेऊन अमोल वाघच्या येलवाडी येथील घरी गेला होता.
वाद मिटवण्यासाठी चर्चा सुरू असताना अमोलची पत्नी देखील घरी उपस्थित होती. मात्र संवादातून तोडगा निघण्याऐवजी वाद अधिकच वाढला आणि दोघांमध्ये जोरदार भांडण झाले. यावेळी अमोल वाघ याने ऋषिकेश पवार याच्यावर हल्ला करण्यासाठी चाकू काढला. हे भांडण सोडवण्याच्या प्रयत्नात योगेश धाकतोंडे मध्ये पडला. त्याचवेळी अमोलने चाकू थेट योगेशच्या बरगडीत भोसकला.
गंभीर जखमी झालेल्या योगेशला तातडीने जवळच्या रुग्णालयात दाखल करण्यात आले. मात्र उपचार सुरू होण्यापूर्वीच डॉक्टरांनी त्याला मृत घोषित केले. घटनेनंतर अमोल वाघ फरार झाला होता. तथापि, म्हाळुंगे पोलिसांनी काही तासांतच त्याला अटक केली आहे.
आरोपी अमोल वाघ याच्यावर यापूर्वी मनमाड येथे गुन्हे दाखल असल्याची माहिती समोर आली आहे. ऋषिकेश पवार, अमोल वाघ आणि मृत योगेश धाकतोंडे हे तिघेही ट्रान्सपोर्ट वाहनांवर चालक म्हणून काम करत होते. दोन जणांच्या वादात निष्पाप तिसऱ्याचा जीव गेल्याने नागरिकांमधून तीव्र हळहळ व्यक्त केली जात आहे.
हत्या झालेल्या योगेश धाकतोंडे आणि आरोपी अमोल वाघ यांची ओळख नव्हती. योगेश हा केवळ मित्रत्वाच्या नात्याने ऋषिकेश पवारसोबत अमोल वाघच्या घरी गेला होता. वाद मिटवण्याच्या उद्देशाने तो मध्यस्थी करत असताना त्याच्या जीवावर बेतू शकते, याची पुसटशी कल्पनाही योगेशला नव्हती. मात्र अचानक दोघांमध्ये वाद उफाळून आल्याने योगेशवर मृत्यू ओढवला. दुसऱ्यांच्या वादात हस्तक्षेप करताना किती गंभीर परिणाम होऊ शकतात, याचा विचार अनेकांनी करण्याची गरज असल्याची भावना या घटनेतून व्यक्त होत आहे.
